Vise Prezidente Parlamentu Indonézia, Fadli Zon (klaran), hasoru malu ho Xefe Negosiadór ba Asuntu Fronteira Marítima no Terestre, Kay Rala Xanana Gusmão (loos), iha Gabinete Fronteira Marítima, Dili, kinta (13/09/2019). Imajen TATOLI/Egas Cristóvão

DILI, 13 Setembru 2019 (TATOLI) – Vise Prezidente Parlamentu Repúblika Indonézia, Fadli Zon, akompañadu hosi Xefe Komisaun V hosi Bankada Gerindra, Fary Djeni  Francis ho delegasaun,  hasoru malu ho Xefe Negosiadór ba Asuntu Fronteira Marítima no Terestre, Kay Rala Xanana Gusmão, iha edifísiu organizasaun Internasionál G7+, Palásiu Governu, Dili, ohin.

Hafoin enkontru, Fadli Zon, hateten objetivu hosi enkontru ne’e atu hametin liután kooperasaun entre Timor-Leste (TL) ho Indonézia.

Nia haktuir katak durante enkontru ho Xanana Gusmão, husu atu hametin liután kooperasaun iha área komérsiu, indústria, peska, ekonomia no mós rezolve disputa fronteira marítima no terrestre.

Nia hatutan, Xanana mós husu atu hahú rezolve uluk fronteira terrestre hafoin marítima liliu atu bele halo mós kooperasaun ho illa sira ne’ebé besik hanesan Alor, Wetar, Flores no seluk-tan.

Bainhira serbisu hamutuk ne’e realiza, sei lori vantajen boot ba rejionál ne’e iha aspetu komérsiu tanba tuir planu sei implementa mós viza livre ho nia vantajen direta ba povu.

Kona-ba proposta ne’ebé Xanana aprezenta, Fadli Zon hateten parte Indonézia entuasiazmu tebes, tanba Governu no Parlamentu Indonézia mós diskute ona atu bele konstrui portu iha illa Alor, atu bele halo ligasaun ka konesaun direta ho Timor-Leste, inklui illa sira seluk iha rejiaun ne’e.

Vise Prezidente Parlamentu Indonézia ne’e afirma katak situasaun ne’e sei aumenta interasaun iha área komérsiu, turizmu ho nia objetu sira.

Kona-ba atu rezolve fronteira terrestre, oras ne’e iha ona faze konsultasaun ne’ebé sei la’o hela, oinsá bele determina fronteira marítima, sei bazeia ba fronteira terrestre.

“Kona-ba kestaun fronteira sira, ita sei rezolve tuir regra no kritéria ne’ebé iha ona”, hateten Fadli Zon.

Tanba ne’e, nia fiar katak durante prosesu diskusaun sei laiha impedimentu kona-ba disputa ruma tanba relasaun entre nasaun rua di’ak tebes.

“Ita-nia relasaun di’ak tebes. Xanana mós dehan katak ita-nia relasaun exelente. Tanba ne’e, ha’u fiar katak sei laiha impedimentu ba rezolve kestaun fronteira”, Fadli Zon esplika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here