Diretor TradeInvest Timor-Leste, Arcanjo da Silva. Imajen/Antonio Goncalves.

DILI, 13 setembru 2019 (TATOLI) – Diretór Ezekutivu Ajénsia Promosaun no Investimentu TradeInvest Timor-Leste, Arcanjo da Silva, hatete hanesan Ajénsia Promosaun no Investimentu prontu ona atu promove potensialidade investimentu iha expo Dubai 2020.

“Ami agora ativamente iha prosesu preparasaun atu bá iha expo Dubai 2020 hodi hamriik iha Autoridade Nasionál ba Expo Dubai (Francisco Kalbuadi Lay) no ekipa interministeriál para promove ita-nia potensialidade investimentu”, Diretór TradeInvest iha edifísiu Ministériu Finansa, Aitarak-Laran, ohin.

Promove Potensialidade investimentu ne’e, Diretór Arcanjo salienta tenke tuir Planu Estratéjiku Dezenvolvimentu Nasionál (PEDN) ne’ebé bele loke investidór sira bele investe iha setór potensiál haat hanesan, Agrikultura no Peska, Turizmu, Indústria Transformadora no Mina-rai.

“Iha promosaun ami sei hatete ami-nia lei investimentu di’ak, fasilidade infrastrutura di’ak hanesan estrada ne’ebé iha konetividade ba munisípiu sira, portu atu di’ak no eletrisidade over supplay tanba ita dezenvolve, ita tenke hakat bá li’ur atu hatete ami iha setór produtividade, ne’ebé imi bele mai investe”, katak.

Timor-Leste presiza duni partisipa espozisaun, forum negósiu no semináriu mundiál sira atu mundu koñese Timor-Leste nia potensiál ba investimentu atu dada investidór sira.

“Ita presiza mós promove katak ami (Timor-Leste) atu dezenvolve ka harii parke indústria iha Likisá, maibé ita nonook de’it sé mak atu mai investe”, afirma.

Antes ne’e, Eis Ministru Turizmu, Arte no Kultura, Francisco Kalbuadi Lay prontu atu organiza komisaun interministeriál hodi lori Timor-Leste partisipa iha espozisaun Dubai 2020.

“Iha tinan 2020 ne’e ita prontu atu partisipa iha espozisaun iha Dubai tanba komisaun organizadora mós oferese ona pavilion ho metru 400 ba ita ho free”, nia kompromete.

Expo Dubai 2020 fó oportunidade boot atu promove kultura, kria mós kontaktu entre setór privadu sira liuliu iha setór ekonómiku, turizmu, indústria no komérsiu.

“Iha tema importante mós ita sei ko’alia mak pás ne’ebé ita sei konvida mós ita-nia na’i-ulun sira ka maun boot atu bá ko’alia kona-ba pás liuliu kontribuisaun Estadu Timor-Leste ba pás iha Mundu no ko’alia mós meiu ambiente”, Kalbuadi dehan.

Espozisaun mundiál ne’e, sei partisipa kuaze nasaun 192 inklui Timor-Leste , ne’ebé sei selebra iha Dubai di Uni Emirat Arab, hahú iha loron 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : TL Prontu Partisipa Iha Expo Dubai Promove Produtu ba Mundu

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here