Vise Ministru Edukasaun Juventude no Desportu, João Zacarias.

DILI, 13 setembru 2019 (TATOLI)-Ministru Edukasaun Juventude no Desportu, João Zacarias informa katak Ministériu Edukasaun, Juventude no Desportu (MEJD) agora daudaun koordena hela ho parte tékniku sira atu rezolve hela fatin ba profesór sira ne’ebé destakadu atu hela besik iha eskola hodi nune’e labele prejudika sira-nia prosesu ensinu aprendizajen.

Tanba, tuir vise-ministru edukasaun ne’e katak profesór sira ne’ebé destaka ba munisípiu barak mak enfrenta hela fatin dook husi eskola no mós saláriu.

“Agora daudaun ita koordena hela atu prepara hela fatin ba profesór sira iha área remota atu sira hela besik iha eskola no ba futuru ita hanoin ona atu haree profesór rai na’in mak ita destaka ba atu nune’e labele prejudika sira-nia servisu,” hateten Vise-Ministru, João Zacarias ba Ajénsia TATOLI iha nia gabinete MEJD, Vila Verde, kuarta (11/09/2019).

Maske nune’e, tuir vise-ministru edukasaun ne’e katak profesór destakadu sira kada ema ida hetan subsídiu dolár 100. “Ida ne’e dezde governu anteriór hala’o tiha ona”.

Governante ne’e haktuir, depois nia asume kna’ar nu’udar vise-ministru foin identifika katak profesór destakadu sira barak mai husi munisípiu seluk hanesan iha Ataúru ne’e barak mak husi Munisípiu Manatuto no Dili.

“Entaun ba futuru presiza haree asuntu ida ne’e ho didi’ak atu nune’e bele dignifika liután profesór sira-nia servisu,” kompromete governante ne’e.

Notísia relevante:MEJD Sei Rezolve Preokupasaun Profesór Sira Iha Ataúru Kona-ba Saláriu

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here