Logo BCTL

DILI, 13 setembru 2019 (TATOLI) – Banku Sentrál Timor-Leste (BSTL) iha loron 13 setembru 2019 kompleta ona tinan ba daualuk nian (2011-2019).

Iha selebrasaun ne’e, Governador Jerál BSTL, Abraão de Vasconselos liuhusi diskursu haktuir katak iha abríl 2019 lansa ona relatóriu  inkluzaun finanseira 2018 ne’ebé iha rezultadu ne’e interesante tebes tanba aprezenta rezultadu lubuk ida ne’ebé ajuda la’ós de’it ba Banku Sentrál, maibé instituisaun finanseira sira própria Governu atu entende saida maka ita iha, saida maka atinje ona no dezafiu saida mak sei presiza tau esforsu hamutuk hodi atinje ba objetivu komún ne’ebé estabelese iha Planu Dezenvolvimentu Nasionál.

Governadór Jerál ne’e hatutan rezultadu hosi relatóriu ne’e mak númeru hosi populasaun adultu ne’ebé asesu ba finanseira bázika iha porsentu 65, maibé iha buat ne’ebé interesante maka númeru feto mak partisipa ou iha asesu ba iha finanseira boot liu mane.

“Iha parte pontu ba asesu ita Timor-Leste iha asesu avansu ida di’ak tebetebes. Ita kompara hanesan porsentu 94 hosi postu administrativu iha asesu ba rede instituisaun finanseira ninian hela de’it postu administrativu haat mak seidauk. Maibé ida ne’e atu hatete katak ita iha mudansa boot kompara ho tinan rua liubá (2016)”, haktuir Abraão de Vasconselos iha Otél Timór, ohin.

Líder másimu BSTL relata mós katak Banku Setrál hahú iha 2015, hamosu inisiativa ida oinsá atu moderniza sistema pagamentu nasionál ne’ebé besik ona to’o alvu.

“Agora daudaun ho haksolok ha’u bele hateten katak ita liu ona dalan klaran ida no ita besik atu ba to’o iha objetivu ne’ebé ita hakarak hosi banku rua (BNU-MANDIRI) ne’ebé hakarak integra sistema P24 ne’ebé mak lansa iha dezembru 2018 no operasaun hothotu la’o ho di’ak. Espera katak banku sira seluk bele joint iha sistema ida ne’e”, afirma.

BSTL aléinde halo mudansa iha modernizasaun sistema nasionál, iha mós mudansa ba jestaun Fundu Petróleu.

“Kona-ba jestaun Fundu Petróleu Timor-Leste hatudu tan avansu partikularmente iha Banku Sentrál. Tanba iha fulan hirak liubá ita-nia Fundu Petróleu hahú investe iha private equity mezmu ida ne’e planu ida antesipa tiha ona iha 2009”, Governadór ne’e katak.

Biban ne’e, Governador Jéral agradese ba apoia hosi entidade hotu tantu hosi nasionál no internasionál , liuliu ba povu Timor-Leste. Agradese mós ba funsionáriu BSTL ne’ebé servisu maka’as hodi ohin loron atinje ba tinan daualuk.

Partisipa iha selebrasaun ne’e hosi Sekretáriu Estadu Komunikasaun Sosiál, Merício Juvinal dos Reis “Akara”, Prezidente Kámara Komérsiu Indústria Timor-Leste (CCI-TL), instituisaun finanseira sira, ONG nasionál no internasionál, no família boot BSTL.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here