Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 13 setembru 2019 (TATOLI)—Prezidente Parlamentu Nasionál, Arão Noé de Jesus da Costa Amaral, haktuir parte Indonézia reklama vistu livre mai Timor-Leste.

“Sira (Indonézia) husu livre vistu. Sira fó tiha ona vistu livre ba ita iha tinan hirak liubá maibé Timor-Leste seidauk implementa. Maski nune’e, ohin ami hateten katak Konsellu Ministru aprova tiha ona. Falta de’it jestaun administrativa,” dehan Arão ba jornalista sira, iha Parlamentu Nasionál, sesta ne’e.

Lee mós: Governu Aprova Rezolusaun Vistu Turizmu Ba Sidadaun Indonézia

Reklamasaun kona-ba vistu livre ba sidadaun Indonézia sira reklama hosi Vise Prezidente Parlamentu Indonézia, Fadli Zon. Fadli Zon reklama asuntu ne’e bainhira hasoru malu ho Prezidente Parlamentu Nasionál, Arão Noe.

Maibé, Arão Noé fiar katak sei implementa vistu livre ba sidadaun Indonézia tama mai Timor-Leste, iha tinan ida ne’e.

Nia dehan, Timor-Leste ho Indonézia tenke hala’o relasaun kooperasaun ho di’ak, tanba nasaun rua ne’e iha interdependénsia ba malu.

“Ita presiza sasán barak tama mai. Ita-nia ekonomia seidauk bele dezenvolve ho di’ak, entaun ita presiza hadi’a relasaun ho Indonézia hodi dezenvolve ita-nia setór sira seluk hodi kompete ba iha merkadu”, tenik Arão.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Ami persiza asaun laos lia fuan deit iha papel..Rezolusaun ba Vistu Livre ba sidadaun Indonezia aprova ona iha Konselu Ministru iha dia 24 Julhu..maibe ohin besik fulan 2 ona sidauk implementa..tamba saida…Ami husu ba Immigrasaun sira dehan..too ohin loron Dirasaun Imigrasaun sidauk hetan kopia Rezolusaun husi governu.

HAKEREK NO HATÁN

Please enter your comment!
Please enter your name here