Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira

DILI, 13 setembru 2019 (TATOLI) – Operasaun konjunta ne’ebé envolve FALINTIL-Forsa Defeza Timor-Leste (F-FDTL) ho Polisia Nasionál Timor-Leste (PNTL) iha liña fronteira Bobonaro ho Covalima, semana ida ne’e, konsege kaptura ema na’in 100 ne’ebé deskonfia envolve iha grupu ilegál hodi ba halo atividade iha Kupaun-Timor Osidentál.

Notísia Relevante : PNTL Seidauk Simu Informasaun Oknum PNTL Tortura Membru Grupu Ilegál

“Dezde horiseik too  agora ami kaer ema sira ne’e husi parte, Suai, Maliana no Liquiça kuaze ema 100-resin, inklui funsionáriu públiku, iha mós xefe suku no xefe aldeia balun no doutór balun tan. Agora ninia prosesu la’o hela,”  informa Komandante Komandu Operasionál Nasionál (KKON), Superintendente Xefe, Pedro Belo ba jornalista, ohin, iha Kuartél Jerál PNTL, Caicoli, Dili.

Durante kaptura membru grupu ilegál sira ne’e, PNTL sita mós atributu hanesan farda husi grupu ilegál ne’ebé lori husi Indonézia tama Timor-Leste no balun tama ba Indonézia ho ilegál liu husi dalan  ilegál no   la uza pasaporte.

PNTL konsidera grupu ilegál sira ne’e kontra Lei Númeru 5/2017 kona-ba Regime Jurídico Relativo à Prática de Artes Marciais, Rituais, Armas Brancas, Rama Rambon ne’ebé publika iha Jornál Repúblika iha 19 Abríl 2017.

Membru sira ne’ebé kaptura agora daudauk sei detein hela iha sela Komandu Munisipiu Bobonaro hodi hein prosesu ba Tribunál.

Pedro Belo, durante halo operasaun konjunta, PNTL no F-FDTL konta kaptura ona ema 300 liu no balun ba tribunál liberta ho razaun la klaru.

“Dezde operasaun ita kaer ema ne’e liu tiha ona ema 300, maibé balun ba tribunál liberta ne’e servisu tribunál nian, maibé PNTL no F-FDTL kontinua halo operasaun,” Pedro Belo hateten.

Nia dehan, PNTL kontinua hametin fatin halo seguransa hodi kontrola grupu ilegál sira ne’ebé sai husi Timor-Leste ba treinu ilegál iha Indonézia.

Jornalista : Eugénio Pereira

Editór       : Francisco Simōes

HAKEREK NO HATÁN

Please enter your comment!
Please enter your name here