Komandante Komandu Operasaun Nasionál (KKON), Superintendente Xefe Pedro Belo. Imajen/PNTL .

DILI, 13 setembru 2019 (TATOLI)- Komandu Polisia Nasionál Timor-Leste  (PNTL)  hasai ona desizaun hodi fó suspensaun ba oknum membru Unidade Polisia Marítima (UPM) ida ne’ebé envolve iha kazu baku membru Konsellu Polisiamentu Komunitáriu (KPK), Aniceto da Costa iha Suku Bebonuk, Munisípiu Dili, foin lalais ne’e.

Komandante Komandu Operasionál Nasionál (KKON), Superintendente Xefe, Pedro Belo, dehan, Komandu Munisípiu Dili aprezenta ona relatóriu ba Komandu no Komandante Jerál PNTL, Komisáriu Faustino do Costa,  hatún fila fali ba Departamentu Justisa PNTL prosesa tuir lei.

“Kona-ba kazu ida ne’e Komandu Munisípiu Dili hasa’e relatóriu mai Komandante Jerál nia fatin, prosesu la’o daudauk ona. Komandante jerál hasai ona sansaun suspensaun  preventiva ba ajente no primeiru sarjentu ne’ebé lidera ekipa ba loron 90 no la signifika sansaun too ne’e de’it, lae, maibé oras ne’e daudauk husi Parte Departamentu Justisa kontinua halo prosesu dixiplinár nian no parte kriminál nian, vítima ne’e rasik halo ona keixa ba Eskuadra Polisia Don Aleixo no ninia prosesu agora la’o hela tuir lei,” hateten Komandante Pedro Belo, ohin, ba jornalista iha Komandu PNTL, Caicoli, Dili.

Kazu ne’e akontese iha loron 9 fulan Setembru 2019,  iha tuku 08:00 kalan, bainhira membru KPK hala’o hela seguransa iha Suku Bebonuk nian hodi asegura seguransa iha suku ne’e, derrepente membru Unidade Polisia Marítima ho joven balun ho kondisaun lanu hadau xave motór hodi hamosu dezentendimentu too ikus halo kedas agresaun fíziku hasoru membru KPK Aniceto da Costa  too ameasa mós vítima no nia família sira iha uma.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here