Sekretáriu Estadu Kooperativa Arsénio Pereira da Silva. Imajen/Egas Cristovão

DILI, 12 setembru 2019 (TATOLI) – Sekretáriu Estadu Kooperativa (SEKoop) husu adisionál hamutuk millaun $4,3 hodi apoia grupu kooperativa sira hodi hasa’e produsaun.

Produsaun ne’ebé mak sai razaun hodi SEKoop husu aumentu mak hanesan agríkola, peska, turizmu no kultura.

“Ami husu adisionál tanba kooperativa ne’e tuir loloos nia área luan, tanba iha dekretu lei númeru 16/2004 artigu 4 hatete katak servisu direta ho grupu kooperativa sira ne’ebé halo produsaun no durante ne’e ami tun ba área remota haree rasik sira halo produsaun barak no ejijénsia ne’e mós mai hosi sira maski iha ona apoiu más lato’o no ita hatene Governu mós iha limitasaun tanba ne’e maka husu adisionál hodi bele apoia sira”, SEKoop Arsenio da Silva Pereira ba TATOLI iha Ministériu Finansa, Aitarak-Laran, ohin, hafoin partisipa reuniaun Komité Revizaun Orsamentu Polítika (KROP).

Governante ne’e konfirma katak pakote fiskál ne’ebé atribui ba SEKoop ba 2020 hamutuk millaun $3,1. “Proposta adisionál ne’e ami propoin de’it no sei diskute kle’an iha parte tékniku ninian, nune’e bele evita dupla orsamentu”.

Arsénio salienta sobre orsamentu 2019 nian ho montante millaun $3,7 ne’e, boot liu maka iha transferénsia públika, tanba iha lei transferénsia públika ne’e ezekusaun porsentu 40 to’o 60 .

“Tanba ne’e maka agora iha porsentu 40 ne’e on going hela, hein tan fali pedidu transferénsia porsentu 60 ne’e, ne’ebé kuandu ida ne’e seidauk maka ami-nia ezekusaun agora ne’e atinje porsentu 38, maibé iha obligation  no commitment hamutuk porsentu 63”, dehan nia.

Sekretáriu Estadu Kooperativa ne’e rekoñese katak hasoru obstákulu iha ezekusaun 2019 tanba hanesan Sekretáriu Estadu foun nune’e orgánika aprova tarde, no mós lideransa seidauk kompletu.

“Ida ne’e maka sai razaun hodi hasoru difikuldade iha ezekusaun. Daudaun ne’e, kargu ba diresaun jerál no finansa maka permanente ona no seluk sei interinu”, haktuir nia.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here