Jogadór FC Porto Taibessi (kamiza azúl) no Académica FC (kamiza metan) ataka malu iha kompetisaun liga primeira divizaun iha Estádiu Munisipál Baucau, Sábadu semana kotuk. Imajen Mídia LFA

DILI, 12 setembru 2019 (TATOLI) – Klube sira hosi Primeira Divizaun apoia desizaun Liga Futeból Amadora (LFA), Ekipa Arbitrajen no Federasaun Futeból Timor-Leste (FFTL) ne’ebé desidi ona atu konvida árbitru internasionál na’in rua dirije jogu Primeira Divizaun.

Prezidente Académica FC, Gil da Conceição, hateten bainhira árbitru internasionál hosi Asian Football Confederation (AFC) sei lidera jogu LFA ne’e di’ak liu atu nune’e arbitru lokál sira bele apriende di’ak liután.

“Ba ami klube, loloos ne’e di’ak tanba árbitru sira mai ne’e level aas ona, entaun sira mai ne’e atu fahe mós sira-nia esperiénsia ba ita-nia árbitru lokál sira bele apriende di’ak liután,” dehan Gil ba Agência Tatoli iha kampu FFTL, Bairro Formosa, kinta ne’e.

Lee mós: Jogu Jornada 12-14 Sei Dirije Hosi Árbitru Internasionál

Nia dehan, prezensa árbitru internasionál ne’e atu hatudu mós ba klube no jogadór hotu hodi sukat diferente hosi árbitru lokál no internasionál iha ne’ebé.

“Árbitru internasionál sira mai ne’e, atu jogadór no klube sira bele haree, iha diferente ka lae ho árbitru lokál sira, tanba ita haree iha jogu sira mosu dezintendimentu hela de’it,” tenik Gil.

Iha sorin seluk, Prezidente Assalam FC, Ipolito Soares, informa konvida árbitru hosi internasionál tanba haree árbitru lokál sira dirije sempre mosu konflitu.

“Konvida árbitru hosi AFC mai ne’e tanba ezijénsia hosi adeptu no klube sira, tanba haree ita-nia árbitru lokál sira sempre mosu konflitu. Entaun, ho prezensa AFC nia árbitru, ita-nia árbitru lokál sira bele apriende di’ak liután,” tenik Ipolito.

Relasiona ho prezensa árbitru internasionál hamosu dezintendimentu uituan hosi árbitru lokál sira, tanba ne’e, Ipolito husu ba órgaun LFA no FFTL atu haree hodi rezolve.

“Ida ne’e FFTL no LFA tenki toma responsabilidade tanba ha’u fiar katak antes konvida árbitru AFC mai, sira koordena ba malu ona. Kuandu ne’e desizaun FFTL, entaun árbitru sira tenke hakruuk tanba árbitru iha FFTL nia okos. Kuandu árbitru balun lakohi koopera, bele fó sansaun,” nia subliña.

Tanba mosu dezintendimentu entre árbitru lokál ho LFA no FFTL, Tatoli tenta atu konfirma ho parte Ekipa Arbitrajen maibé laiha fatin tanba maioria árbitru sei lidera hela jogu Festivál Nasionál Desportu (FND) iha Baucau.

Iha parte seluk, Joâo Amaral hanesan adeptu Lalenok United FC sente kontente ho prezensa árbitru internasionál ne’ebé atu dirije jogu hirak tuir mai.

“Hanesan adeptu, ha’u sente kontente tebes bainhira LFA no FFTL desidi konvida árbitru hosi internasionál mai hú iha jogu LFA. Ami haree jogu durante ne’e furak maibé árbitru sira mak estraga,” João haktuir.

Entretantu, árbitru rua ne’e to’o ona iha Timor-Leste, kinta meudia ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here