Komandante sesante Sentru Formasaun Terenu (SFT) Tenente Koronel, Celestino Pinto “Daeleba” (karuk) entrega relatoriu ba Komandante foun SFT, Tenente Koronel, Cezario Marçal Ximenes “Haksolok” (kuana), durante transferensia poder asiste direita husi Vice Xefe Estadu Maior Forsas Armada, Brigadeiro Jeneral, Falur Rate Laek iha Komandu F-FDTL, Metinaro, Dili, kinta (12/09/2019). Imajen/Eugénio Pereira

METINARO, 12 setembru 2019 (TATOLI)- Komandu FALINTIL-Forsas Defeza Timor-Leste F-(FDTL)  husu ba Governu Timor-Leste liu husi Instituto Nacional de Desenvolvimento de Mão de Obra (INDIMO) atu akredita Sentru Formasaun Kursu Lian Ingles  iha F-FDTL.

“Ha’u hakarak atu dehan katak, Sentru Formasaun Lian Ingles ne’ebé harii dezde 2000 too agora prodús ona ita nia rekursu ofisial barak maka aprende no ko’alia Lian Ingles sai sulin tebes hanesan bee,”  informa Vise Xefe Estadu Maiór F-FDTL, Brigadeiru Jenerál, Falur Rate Laek, ohin, iha Sentru Formasaun Treinamentu F-FDTL, Metinaro, Dili.

Ohin loron, tenik Falur Rate Laek, forsa maioria mak ko’alia lian Ingles duke Portugés. Tanba ne’e husu ba governu para bele ba  haree hodi akredita sentru formasaun refere.

 “Portugés sai mós lian ofisial ita nian, tanba ne’e ba futuru Komandu F-FDTL hatama planu atu transforma ba Sentru Lingua ida ne’ebé sei akumula mós Lingua Portugés sei kompleta ho fasilidade ne’ebé sei husu embaixada sira nia apoiu mestre no mestra sira hanorin lian Portugés, ” hateten Falur Rate Laek.

Falur dehan, kualkér militár F-FDTL sira ne’ebé atu hala’o misaun dame nian iha Organizasaun Nasoins Unidas (ONU) tenke tuir lai formasaun lian Ingles kompleta no preparadu ona foin bele hola parte iha misaun dame ONU nian.

Relatóriu ne’ebé Ajénsia TATOLI asesu husi Sentru Formasaun Ingles F-FDTL ne’ebé harii husi 2000 too agora akredita ona membru no komandante barak maka hatene ona ko’alia lian Ingles.

Estatístika Sentru Formasaun Lian Ingles F-FDTL iha tinan 2013 too agora akredita oan membru kuaze 150 no agora daudaun membru F-FDTL na’in 120 maka sai ona ba rai li’ur hodi tuir estudu akadémiku iha Australia, Nova Zelándia, Japaun inklui membru sira ne’ebé hola parte iha misaun dame ONU nian iha rai li’ur.

Mestre sira ne’ebé hanorin iha sentru ne’e mai husi ema voluntáriu na’in sia (9) husi rai li’ur, inklui formadór husi membru F-FDTL nian hamutuk ema na’in 16.

Difikuldade ne’ebé Sentru Lian Ingles F-FDTL enfrenta maka sei menus livru atu fó ba kandidatu estudante sira aprende no lee durante tuir kursu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here