iklan

NASIONÁL, HEADLINE

Núnsiu Apostóliku Konvida Timoroan Sira Hanoin Hikas Vizita São João Paulo II

Núnsiu Apostóliku Konvida Timoroan Sira Hanoin Hikas Vizita São João Paulo II

Ambiente misa agradesimentu komemorasaun tinan 30 vizita São João Paulo II, iha Igreja Katedral Díli. Imajen/Cipriano Colo

DILI, 11 setembru 2019 (TATOLI) – Núnsiu Apostóliku iha Timor-Leste, Arcebispo Mgr. Joseph Marino ho ninia vise vise Mgr. Marco Sprizzi, serbisu hamutuk ho Bispu sira Konferénsia Episkopál Timoroan, Konvida timoroan hotu hodi hanoin hikas vizita istóriku tinan 30 visita São João Paulo II iha Timor Leste, iha 12 outubru 1989.

Iha omília, Dom Virgílio hato’o hikas Jesus Nia Liafuan, ne’ebé São João Paulo II hato’o iha Tasi Tolu bainhira prezide Eukaristia hamutuk ho timoroan sira rihun ba rihun dehan, “Imi masin rai nian, Imi mundu nia naroman”.

Dom Virgílio esplika, liafuan ne’ebé São João Paulo II hato’o iha momentu ne’ebá, hakarak konvida timoroan hotu atu fó sasin kona-ba fiar iha rai ne’e.

Iha momentu ne’ebá, São João Paulo II hatudu nia papél importante ba Igreja Universál no Igreja Timor, liuliu ba libertasaun povu husi okupasaun.

Bispu ne’e konta tuir katak, bainhira São João Paulo II sama ain iha Tasi Tolu, Nia dehan, “Ha’u haksolok tebes selebra Eukaristia hamutuk ho imi”.

“Ha’u mai iha ne’e hanesan Kristu nia saseluk nomós São Pedro nia saseluk atu fó forsa ba Ha’u nia maun alin sira iha rai ne’e”, tenik São João Paulo II.

Ho liafuan ne’e, Dom Virgílio konsidera São João Paulo II nu’udar misionáriu bo’ot ida ba Esperansa nian.

Nune’e, Bispu Díli ne’e husu timoroan hotu nu’udar sarani atu sai misionáriu ba esperansa nian iha tempu ohin loron, ne’ebé nakonu ho krize oioin, liuliu krize identidade, polítika, sosiál no seluk tan.

“Husu timoroan sira hotu atu agradese ba Maromak tanba haraik ona São João Paulo II iha momentu ne’ebé timoroan sira iha tempu susar nia laran. Hein katak, ho Eukaristia Santa ne’e sei lori sarani timoroan hotu sai duni masin no naroman mundu nian iha tempu ohin loron”, Dom Virgílio.

Partisipa iha misa ne’e, Prezidente Republika, Francisco Guterres Lú Olo ho ninia Esposa, Cidalia Lopes Nobre Mouzinho Guterres, membru governu no deputadu balun, Esposa Primeiru-Ministru, Isabel Ferreira, diplomata sira, líder relijiozu no sarani sira.

Eukaristia ne’ebé hala’o iha Igreja Katedrál Imaculada Conceição Dili, prezide husi Bispu Dioseze Díli, Dom Virgílio do Carmo da Silva, hamutuk ho konselebrante prinsipál sira mak hanesan Prezidente Konferénsia Episkopál Timoroan no Bispu Dioseze Maliana, Dom Norberto do Amaral, Sekretariu Jerál Konferénsia Episkopál Timoroan no Bispu Dioseze Baucau, Dom Basílio do Nascimento, Núncio Apostoliku arcebispo Mgr. Joseph Marino no vise Núnciu Apostóliku Mgr. Marco Sprizzi.

Jornalista: Cipriano Colo

Editór: Xisto Freitas

iklan
iklan

Leave a Reply

iklan
error: Content is protected !!