Ministru Obra Públika, Salvador Soares dos Reis Pires. Imajen/TATOLI.

DILI, 11 setembru 2019 (TATOLI) – Ministru Obra Públika, Salvador Eugénio Soares dos Reis Pires, informa iha semana kotuk loke ona sesaun foti dadus ba abitante afetadu sira iha rotunda Komoro hodi hafasil kompañia halo konstrusaun estrada.

Ministériu Obra Públika (MOP) hetan ona despaxu husi Primeiru-Ministru atu koordena ho liña ministeriál hanesan Ministériu Justisa no Estatál atu iha tempu besik halo sosializasaun ba komunidade tanba Governu halo akordu ho sira halo indenizasaun.

Bazeia ba orientasaun Primeiru-Ministru, MOP hahú hala’o ona diskusaun interministeriál ne’ebé MOP mak lidera atu hahú foti dadus.

“Ha’u loke tiha ona sesaun ne’e no orienta ona ba Diresaun Jerál Obra Públika no liña ministeriál sira atu hahú foti dadus ba komunidade afetada sira”, Ministru Salvador ba Ajénsia Tatoli iha Palásiu Governu, ohin

Antes ne’e, Diretór Jerál MOP, Rui Hernani, informa estudu preliminár finaliza ona, maibé presiza tan forma ekipa interministeriál atu hala’o identifikasaun ba asset abitante sira.

“Ami sei halo hela identifikasaun ba propriedade abitante ne’ebé hetan afeta hodi hala’o pagamentu, molok muda sira husi fatin ne’e”, katak.

Tanba ne’e, MOP kontinua halo negosiasaun ho abitante kuaze 200-resin ne’ebé afetada ba haluhan estrada trosu Tasitolu- Rotunda Komoro hodi haree ba propriedade abitante liuliu uma no ai-horis inklui asset sira.

Iha estudu preliminár, Diretór Jerál ne’e dehan deteta kuaze rai ne’ebé abitante sira hela ne’e rai Estadu hotu, maibé rezidente sira iha ona asset ne’ebé presiza fó kondisaun.

Estrada Tasitolu-Rotunda Komoro ne’e, kuaze kilómetru rua hamutuk ho pakote estrada trosu Tibar-Tasitolu ne’ebé ka’er husi kompañia internasionál China Wuyi ho kustu millaun $12-resin, hahú iha loron 28 fulan-Fevereiru tinan 2017 to’o Outubru 2019.

Notísia orijinál : MOP Orienta Halais Prosesu Indentifikasaun Propriedade Abitante iha Rotunda Komoro

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here