Diretór Nasionál Orsamentu Estadu, Salomão Yoaquim. Foto/ Mídia MF.

DILI, 11 setembru 2019 (TATOLI) – Diretór Nasionál Orsamentu Estadu Ministériu Finansa (MF), Salomão Yoaquim, informa Komité Revizaun Orsamentu Polítika (KROP) la konsidera direta proposta adisionál sira ne’ebé aprezenta iha reuniaun KROP loron dahuluk (09/09), tanba grupu tékniku sei halo diskusaun kle’an liuliu haree fali ba ezekusaun orsamentu ninian.

Ministériu no instituisaun sira ne’ebé aprezenta iha loron dahuluk mak hosi kapitál sosiál hanesan Prokuradór Jerál Repúblika (PJR), Ministériu Edukasaun, Juventude no Desportu, Sekretáriu Estadu Juventude no Desportu (SEJD), Ministériu Ensinu Superiór Siénsia no Kultura, National Institute for Science and Technology (INCT), Institutu Politékniku Betanu (IPB), Arkivu Muzeu Rezisténsia Timorense (AMRT), Ajénsia Nasionál Avaliasaun no Akreditasaun no Akademika (ANAA) no Universidade Nasionál Timor Lorosa’e (UNTL).

“Proposta adisionál iha diskusaun KROP loron dahuluk la Konsidera direta tanba grupu tékniku sei haree kle’an nune’e ninia porsaun labele implika Orsamentu Jerál Estadu ne’ebé deside ona Billaun $1.6 ne’e. Razaun ida la konsidera direta tanba liga ho sira-nia ezekusaun rasik, no mós ba programa ne’ebé sira iha, se lae iha programa, maibé ikus mai la implementa”, Salomão afirma ba Tatoli iha Ministériu Finansa, Aitarak-Laran, ohin.

Maibé, proposta adisionál iha loron daruak nian KROP konsidera direta tanba pertinente. Iha loron daruak ne’e, aprezenta hosi Ministériu Saúde kompostu hosi Ospitál Nasionál Guido Valadares (HNGV, sigla portugés), Servisu Autónomu no Medikamentu no Ekipamentu Médiku, Laboratóriu Nasionál Saúde, Institutu Nasionál Saúde (INS), Ministériu Solidariedade Sosiál no Inkluzaun, Sentru Nasionál Reabilitasaun, no Sekretária Estadu Igualdade no Inkluzaun (SEII).

“Iha Ministériu Saúde nian konsidera ne’e hanesan Ospital Nasionál Guido Valadares tau osan rihun $200 hodi sosa mákina fase raan, nune’e mós ba Laboratóriu Nasional Saúde, INS, iha SEII ne’e mós konsidera direta hanesan fó apoia ba feto no aumenta sira-nia funsionáriu ne’e tau osan hamutuk rihun $132.6. Nune’e mós Institutu Apoiu Dezenvolvimentu Emprezariál no mós Sentru Reabilitasaun”, esplika Diretór Salomão.

Entretantu, nia salienta la’ós maioria proposta adisionál ne’ebé aprezenta hosi ministériu no instituisaun sira iha loron daruak ne’e KROP konsidera direta hotu.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here