iklan

NASIONÁL, HEADLINE

Igreja Katólika Sempre Hamriik iha Povu TL Nia Sorin

Igreja Katólika Sempre Hamriik iha Povu TL Nia Sorin

Prezidente Repúblika, Francisco Guterres Lú Olo. Imajen: TATOLI

DILI, 11 setembru 2019 (TATOLI)—Prezidente Repúblika, Francisco Guterres Lú Olo, haktuir misa ne’ebé Santu Padre João Paulo II selebra iha 12 outubru 1989, iha Tasi-Tolu, marka kapítulu foun ida iha Timor-Leste (TL) nia istória ukun rasik-aan.

“Iha Tasi-Tolu, Santu Papa hato’o mai ita Jesus nia Liafuan, ne’ebé hato’o ba nia eskolante sira hodi dehan “Imi masin rain nian… Imi naroman mundu nian”. Iha loron ne’ebá, hafoin misa ramata, akontese primeira manifestasaun públika no organizada ne’ebé hetan kobertura hosi mídia internasionál. Ne’e duni, vizita Santu Padre João Paulo II koloka Timor-Leste iha mundu! Povu Timor-Leste nia sentimentu gratidaun ba Santu Padre boot tebes no, tanba ne’e, mak ita harii ona monumentu istóriku ida hodi fó omenájen ba Santu Papa João Paulo II, iha Tasi-Tolu,” Xefe Estadu ko’alia kestaun ne’e iha salaun Irman Saleziana iha Comoro bainhira partisipa iha Komemorasaun Tinan 30 Vizita Santu Padre João Paulo II, ohin.

Nia informa katak Igreja Katólika nia kna’ar importante nu’udar instituisaun ida ne’ebé sempre hamriik iha povu Timor-Leste nia sorin, ajuda hametin lian nasionál sira no lisan timoroan sira-nian no, nune’e, ajuda hametin rezisténsia kulturál–riin metin ida ne’ebé garante timoroan nia moris nu’udar povu ho identidade rasik.

Prezidente Repúblika apela timoroan sira atu nafatin ho espíritu revolusionária hodi funu hasoru injustisa no dezafiu oioin ne’ebé sai ameasa ba dezenvolvimentu nu’udar Estadu Direitu Demokrátiku ida ne’ebé justu no solidáriu.

“Ha’u kaer Amu Papa Francisco nia liafuan ne’ebé dehan katak ‘ohin loron kristaun ida ne’ebé la’ós revolusionáriu, la’ós kristaun’, hodi halo apelu ida ba ita hotu katak ita tenke iha nafatin espíritu revolusionáriu ida hodi funu hasoru injustisa no dezafiu oioin ne’ebé sai ameasa ba ita-nia dezenvolvimentu nu’udar Estadu Direitu Demokrátiku ida ne’ebé justu no solidáriu. Ha’u apela mós ba ita hotu atu  kuda fini esperansa nian. Atu halo ida ne’e, ita labele rezigna-aan, ka hatún liman maibé, ita tenke fiar nafatin katak, maski iha tempu susar nia laran, ho difikuldade oioin, ita bele hakat dezafiu hotu bainhira ita kuda fini esperansa nian hamutuk ho diálogu no ho inkluzaun,” Lú Olo apela.

Ho rekoñesimentu boot ba Sua Santidade Papa Francisco nia serbisu no esforsu tomak ba Dame no Domin iha mundu tomak, Xefe Estadu hakotu nia intervensaun hodi dezeja saúde no forsa nafatin ba Sua Santidade hodi kontinua nia misaun importante ida ne’e.

Jornalista: Cipriano Colo

Editór: Xisto Freitas

iklan
iklan

Leave a Reply

iklan
error: Content is protected !!