Aeroportu Prezidente Nicolau Lobato, Comoro, Dili. Imajen/Google.

DILI, 11 setembru 2019 (TATOLI) – Diretór Jerál hosi Ministériu Transporte no Komunikasaun (MTK), Tomas Lobato, haktuir Primeiru-Ministru, Taur Matan-Ruak hatún ona despaxu atu forma ekipa hodi halo re negosiasaun ho Governu Japaun liuhosi Japan International Cooperation Agency (JICA), kona-ba kualidade dezeñu Aeroportu Internasionál Nicolau Lobato Komoro, Dili.

“Dezeñu ne’ebé uluk sira oferese, ita-nia Governu liuhosi Primeiru-Ministru haree katak ladún refleta ba ita-nia Aeroportu Internasionál Nicolau Lobato, tanba ne’e despaxu ne’ebé iha atu halo re negosiasaun”, Tomas Lobato ba Ajénsia Tatoli iha Ministériu Finansa, Aitarak-Laran, ohin.

Tomas Lobato adianta katak Governu Timor-Leste sei forma ekipa ida, ekipa hirak ne’e sei mai hosi Ministériu Transporte Komunikasaun no Ministériu Obra Públika inklui entidade relevante seluk atu re negosia dezeñu aeroportu ho Governu Japaun.

 Antes ne’e, Governu Japaun informa sei apoiu orsamentu hamutuk millaun $44 hodi halo konstrusaun ba aeroportu, orsamentu hirak ne’e sei uza hodi hadi’a ba komponente lima maka hanesan terminál pasajeiru, torre kontrolu, upfront, tax way no para fatin ba aviaun.

Konstrusaun aeroportu sei hahú iha marsu 2020, nune’e sei remata iha fulan 20 nia laran, hafoin entrega ba Governu Timor-Leste.

Notísia relevante : Governu Hakarak Aeroportu Dili Ho Rekizitu Padraun Internasionál

Japaun Sei Konstrui Komponente Lima  Iha Aeroportu Internasionál Komoro

Jornalista  : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here