Ilustrasaun hosi google.

DILI, 11 setembru 2019 (TATOLI)-Komisaun Nasionál Ba Kombate HIV/SIDA Timor-Leste (CNCS-TL-sigla portugés) sensibiliza informasaun kona-ba impaktu husi seksu livre, ne’ebé iha risku ba hamosu moras HIV/SIDA, isin-rua sedu, kaben sedu no soe oan, ba estudante sira iha SOLS (Science of Life System) Becora, Postu Administrativu Cristo Rei, Munisípiu Dili, atu nune’e estudante sira bele iha koñesimentu kona-ba moras HIV/SIDA ne’e rasik.

“Ita ko’alia ho sira oinsá mak ema ida-idak bele prevene sira-nia aan husi transmisaun HIV no hadook sira-nia aan husi hahalok sira ne’ebé iha risku,” hateten Diretór Rekursu Umanu HIV/SIDA Timor-Leste, Venâncio Coelho ba jornalista sira bainhira fó sensibilizasaun informasaun kona-ba HIV/SIDA ba juventude sira iha SOLS Becora, Dili, ohin.

Nia dehan, matéria ne’ebé aprezenta ba juventude sira mak primeiru  moras hada’et relasaun seksuál ninian mak hanesan  moras hirak  ne’ebé mak dala barak fó da’et liuhusi atividade relasaun seksuál. Segundu, ita ko’alia ba sira oinsá mak ema hadook aan husi hahalok ne’ebé lori ita ba  transmisaun HIV no oinsá mak atu halo prevensaun moras ida ne’e.

Ao mesmo tempu ita mós informa ba juventude sira kona-ba informasaun jerál HIV/SIDA iha ita-nia nasaun ne’e to’o iha ne’ebé ona,” dehan diretór rekursu umanu ne’e.

Iha fatin hanesan, Diretora Nasionál SOLS Timor-Leste, Graciana Herculano dehan katak programa CNCS-TL di’ak tebes tanba, tuir nia, agora daudaun juventude sira ne’ebé konsentra iha SOLS hamutuk 750 ne’ebé mai husi munisipiu hothotu no tanba  joven barak mak ladún hatene kona ba HIV/SIDA no sira-nia koñesimentu menus liubá moras ida ne’e.

Diretora SOLS ne’e hateten, programa ida ne’e atu ajuda sira para hatene kle’an liután ba moras HIV/SIDA no sira nia moris mós sei dezenvolve liután no sira mós hatene saida mak di’ak no saida mak aat.

Tuir nia, bainhira kampaña sensibilizasaun la  la’o entaun sira-nia koñesimentu ne’e mós la iha. Bainhira koñesimentu la iha, halo buat arbiru de’it maibé ho treinamentu hanesan ne’e halo juventude SOLS Becora nia hanoin aumenta liután.

Ezekutiva SOLS Becora, Graciana Herculano garante katak ba ba futuru sei koopera di’ak liután ho CNCS-TL hodi kontinua nafatin halo sensibilizasaun ba estudante sira.

“Estudante sira ne’e iha tinan rua no tinan ida sempre troka malu no halo graduasaun. Entaun, informasaun sira hanesan ne’e fulan oin ka fulan neen estudante seluk mak hetan fali tanba ne’e mak halo kooperasaun ho di’ak ho Komisaun Nasionál Kombate HIV SIDA Timor Leste  ba futuru sei hamenus moras HIV iha nasaun ida ne’e,” nia hateten.

Partisipa iha atividade sensibilizasaun CNCS-TL kona-ba transmisaun HIV/SIDA alende estudante sira inklui mós fasilitadór sira iha SOLS Becora ne’e.

Notísia relevante:Prevene HIV/SIDA, Inan-Aman No Igreja Iha Papel Importante Fó Atensaun Oan Sira

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here