Poeta Timor-Leste, Abe Barreto Soares

DILI, 10 setembru 2019 (TATOLI)—Poeta Timor-Leste, Abe Barreto Soares, reprezenta Timor-Leste ba tuir “La Tansa International Literary Festival” iha Indonézia ho tema “Islamic Literature, The Spirit of Humanity, Modernity”.

“Ha’u mai tuir festivál literáriu Internasional La Tansa iha Indonézia. Ha’u mai reprezenta Timor-Leste. Tuir loloos poeta Sandra Tilman mós mai tuir maibé tanba okupadu ho oan sira to’o ikus nia la mai,” dehan Poeta no Múziku, Abe Barreto, ba Ajénsia TATOLI liuhusi entrevista via rede sosiál (WA), tersa (10/9/2019).

Nia haktuir, iha eventu ne’e partisipante husi Indonézia mak barak liu. Eventu ne’e foin hala’o ba dahuluk ne’ebé hala’o iha Pondok Pesantren la Tansa iha Lebak, Banten, Java Osidentál. Poeta koñesidu Indonézia hanesan Sutardji Calizoum Bachri, Abdul Hadi WM no D. Zawawi Imron mós tuir eventu ne’e.

“Hanesan timoroan reprezenta Timor-Leste iha eventu ne’e, ha’u sente haksolok. Ne’e momentu furak atu aprende barak liután kona-ba literatura, oinsá organiza festivál literatura no kria rede kontaktu ho eskritór sira husi rai sira seluk. Eventu ne’e loke ho palestra ho títulu ‘Musik Islam dan Puisi Dakwah’. Depois mós ha’u sei ba dadalia iha Jakarta iha 8 Setembru lokraik kona-ba ‘Pengaruh Sastra Indonesia Pada Penyair Timor-Leste’,” nia informa.

Festivál ne’e, nia esplika, ho objetivu atu halibur eskritór sira hodi fahe esperiénsia kona-ba umanizmu relasiona ho literatura no islamizmu. Festivál ne’e lori eskritór sira atu kria amizade no atu haburas no hamatak literatura ba labarik otas nurak sira iha eskola sekundária no pre-sekundária. Iha biban ne’e, Abe Barreto mós hanorin labarik sira iha Pesantren kona-ba creative writing relasiona ho espiritualidade.

“Kmanek murak. Furak ba kolaborasaun. Poeta sira husi nasaun seluk haksolok tebes tanba Timor-Leste lori nuansa murak ai-knananuk no dadolin úniku ne’ebé aprezenta iha dalen Tetun, Portugés no dalen Indonézia. Ne’e hariku nuansa literáriu iha Festival La Tansa ne’e,” Abe Bareto esplika.

Nia haktuir, iha festivál refere nia mós kanta no lee poezia Timor-Leste nian. Nia lee poezia no kanta Fernando Sylvan nia poezia “Infância” no “Funu”, lee poeta Xanana Gusmão nia poezia kona-ba tasi “Mar Meu” no lee ninia obra ida iha versaun Indonézia ho Inglés ho títulu “Akulah Sebuah Kerikil Yang Kau Lemparkan Ke Sebuah Kolam”.

Poema ne’e, nia informa, publika ona iha antolojia TERRA iha Darwin-Australia no lansa tiha ona  iha Ubud Bali iha 2007, durante Ubud Readers and Writers Festival.

Festivál literáriu La Tansa Internasional ne’e, iha nasaun estranjeiru lubun mak tuir inklui Timor-Leste ho uma na’in Indonézia ne’ebé realiza durante loron rua (6-7 Setembru 2019) nia laran. Poeta husu nasaun hirak seluk ne’ebé mak tuir festivál refere mak Brunei Darusalam, Malázia, Thailandia, Singapura no Eziptu.

Jornalista: Cancio Ximenes

Editór      : Rafi Belo

HAKEREK NO HATÁN

Please enter your comment!
Please enter your name here