Vitima dezastre ai-tohar iha Aldeia Hatuhei, Suku Dukurai, Postu Administrativu Letefoho, Munisípiu Ermera. Imajen/foti husi Facebook

DILI, 10 setembru 2019 (TATOLI)-Sekretáriu Estadu Protesaun Sivíl (SEPS) liu husi Diresaun Dezastre Munisípiu Ermera,  distribui ona apoiu emerjénsia ba vítima dezastre naturaís ai-tohar ne’ebé rezulta ema na’in rua mate no 94 hetan kanek iha Aldeia Hatuhei, Suku Dukurai, Postu Administrativu Letefoho, Munisípiu Ermera.

Kazu ne’e akontese iha loron 09 setembru 2019, bainhira família uma Lisan Locor realiza serimónia kulturál hodi halibur fetosaa no umane.

Diretór Jerál husi Sekretáriu Estadu Protesaun Sivíl, Superintendente Asistente, Polisia Nasional Timor-Leste (PNTL), Ismael da Costa Babo, relata, apoiu emerjénsia hirak ne’e mak hanesan mina, hena, sabaun, susu been, sanan, bikan, tasu no seluk tan.

“Apoia emerjénsia ne’e bele sustenta vítima sira nia moris durante afetadu,” informa  Ismael Babo, ohin, hodi responde  ba  Ajénsia TATOLI iha nia servisu fatin, Caicoli, Dili.

Vítima na’in 94 ne’ebé hetan kanek daudaun ne’e halo hela tratamentu médiku iha Ospitál Gleno, Munisípiu Ermera.

Tuir verifikasaun dadus husi Sekretáriu Estadu Protesaun Sivíl  iha iha loron 01 setembru, rejista kazu ahi han uma rua no anin sobu uma komunidade ida iha Aldeia  Simuhei, Suku Hatulia,  Postu Administrativu Hatulia  Villa.

Iha loron 07 setembru, ahi han uma lulik ida iha Suku Babiolete, Postu Administrativu Atsabe, Munisípiu Ermera.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here