Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 10 setembru 2019 (TATOLI) – Alterasaun artigu balun iha Lei Fundu Petrolífera (LFP) no Lei Atividade Petrolífera (LAP) ne’ebé Prezidente Repúblika, Francisco Guterres Lú Olo veta ona, Parlamentu Nasionál (PN) sei foti desizaun ba lei rua ne’e hafoin resesu.

“Parlamentu Nasionál iha loron 90 hodi halo reapresiasaun, maibé oras ne’e sei iha prosesu hela. Semana ne’e sei iha reuniaun líder bankada hafoin sei haree asuntu ne’e atu halo oinsá, kabe ba bankada sira-nia desizaun atu halo saida ba asuntu ne’e’’, Prezidente Parlamentu Nasionál (PPN), Arão Noé de Jesus da Costa Amaral ba jornalista sira, iha PN, tersa ne’e.

Notísia Relevante: PN Sei Ajusta Artigu Balun iha LFP-LAP Ne’ebé PR Veta

Nia esplika, iha opsaun tolu mak PN bele foti, dahuluk halo konfirmasaun votu ba lei rua ne’e, daruak halo alterasaun ba lei sira ne’e, datoluk mak bele rai tiha hafoin Governu mak rezolve liuhosi lei númeru 1/2019, alterasaun dahuluk ba Lei Atividade petrolífera.

“Opsaun sira ne’e bele iha hotu, agora konforme desizaun bankada sira-nian iha plenária. Governu hanesan autór lei, nia opsaun mak saida. Ami sei hein to’o 16 setembru bainhira Parlamentu funsiona normál ona mak ami foin haree ba asuntu ne’e’’, dehan PPN.

Nia akresenta, semana ne’e PN sei halo kontaktu ho Governu atu bele hetan opsun saida mak sei opta, ein relasaun ba asuntu ne’e.

“Opsaun tolu ne’e di’ak hotu, kabe ba ba desizaun iha plenária, entaun desizaun iha plenária mak foti. Parlamentu ne’e órgaun kolejiál katak desizaun hotu-hotu koletivu’’, subliña Arão Noé.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here