Adidu Traballu Timor-Leste ba Austrália, António Armindo. Imajen/Tatoli.

DILI, 10 setembru 2019 (TATOLI) – Adidu Traballu Timor- Leste ba Austrália, António Armindo, hatete traballadór timoroan ne’ebé serbisu iha Austrália ba programa serbisu sazonál nian la domina di’ak lian-inglés nune’e difikulta sira iha serbisu fatin.

“Ita-nian maluk sira ne’ebé maka haruka bá Austrália barak maka difikuldade kona-ba língua. Tanba iha ajénsia barak iha ne’ebá hakarak sira bá ho inglés la hatene mós la problema, maibé no fim to’o iha ne’ebá halo fali komunikasaun bázika ba serbisu loroloron nian. Tanba sira la komprende tenke uza fali team leader no supervizór sira hodi halo tradusaun ba sira”, informa António ba jornalista sira iha Kaikoli, ohin.

Tanba ne’e maka kompañia barak iha Austrália husu ba Governu Timor-Leste liuhusi SEFOPE atu haruka timoroan tuir kursu hodi aprofunda dalen-inglés antes haruka bá seasonal worker program (SWP) atu labele hetan problema iha língua. Nune’e sira bele halo serbisu no mós halo komunikasaun ne’ebé di’ak iha knaar fatin.

António dehan durante nia mandatu nu’udar adidu dezde janeiru tinan ne’e, simu keixa husi kompañia sira tanba de’it língua ne’ebé traballadór timoroan ladún domina.

Aléinde ne’e kona-ba oras serbisu nian dalaruma serbisu-na’in sira la tuir oráriu tanba hadeer tarde, kalan la toba sedu, no la komprende oras serbisu Austrália, nune’e empreza sira kestiona.

“Maibé nu’udar adidu ba rezolve no tenta halo diálogu ho kompañia sira no hetan solusaun duni”, Antonio Armindo konta.

Nia haktuir katak dezde janeiru 2019 traballadór ne’ebé maka serbisu iha Austrália ba programa SWP hamutuk 700 ona. Maibé kona-ba tarefa husi ida ne’e, Timor-Leste foti ona 1000-resin, tanba ne’e sira bá tiha depois fulan neen kontinua filafali.

“Dala barak empreza hakarak ema tuan sira maka bá hela de’it. Nu’udar adidu tenta halo aproximasaun hodi haruka ema foun bá tan tanba ne’e polítika Governu liuhusi SEFOPE atu hamenus dezempregu iha rai-laran.

Sekretáriu Estadu Estadu Formasaun Profisionál no Empregu, Julião da Silva, hatete SEFOPE sei orienta SENAI Bekora hahú fó formasaun língua inglés hodi aprofunda timoroan sira-nia koñesimentu, bainhira  faze tuirmai SWP nian dalen labele sai obstákulu tan.

SEFOPE sei kontratu ho Industry Safety Assessment and Training (ISAT) no East Timor Development Agency (ETDA) hodi fó formasaun ba kandidatu SWP Austrália no agora kursu komesa la’o ona iha munisípiu.

“Husu ba kandidatu SWP nian no foin-sa’e sira tenke tuir kursu báziku lian inglés, nune’e karik liu iha vaga SWP antes bá Austrália ita mós hatene ona “, governante ne’e sujere.

Nia hatutan daudaun serbisu iha Austrália difikuldade maka iha komunikasaun no atu prevene ida ne’e tenke kapasita aan.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here