Sekretáriu Estadu Asuntu Kombatente no Libertasaun Nasionál, Gil da Costa Monteiro “Oan Soru”. Imajen/Eugénio Pereira

DILI, 10 setembru 2019 (TATOLI)-Sekretáriu Estadu ba asuntu Veteranu no Antigu Kombatente Libertasaun Nasionál, Gil da Costa Monteiro ‘Oan Soru’, hateten, ninia parte seidauk deteta númeru veteranu falsu barak eziste  iha Munisípiu Manufahi.

Notísia Relevante : Veteranu ‘Falsu’ Sei Simu Konsekuénsia

Oan Soru hato’o komentáriu  hodi hatán ba relatóriu Grupu Independente ne’ebé relata ba Prezidente Repúblika, Francisco Guterres Lú Olo, foin lalais, katak sira identifika veteranu barak falsifika dokumentu hodi hetan pensaun husi Estadu.

Munisípiu Manufahi tama iha rejiaun III ne’ebé sai sentru gerrilla rezisténsia ba funu durante tinan barak,  tanba ne’e, Oan Soru, dehan veteranu sira ne’ebé rejista daudaun ne’e  iha Munisípiu Manufahi   involve mós iha prosesu luta ba ukun rasik aan.

Sekretáriu Estadu ba asuntu  Veteranu no Antigu Kombatente Libertasaun Nasionál, duvida ho ezisténsia grupu Independente ninia relatóriu tanba seidauk verifika informasaun ho loloos no momoos.

“Ha’u labele dehan sira nia relatóriu ne’e sala no loos,” afirma Sekretáriu Estadu,  Gil da Costa “Oan Soru”  ba Ajénsia TATOLI, ohin, iha Caicoli, Dili.

Kona-ba veteranu hirak maka daudaun ne’e falsifika dokumentu hodi hetan pensaun husi Estadu, nia dehan, seidauk identifika veteranu  falsu ho  númeru ezatamente iha territóriu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here