Sekretáriu Estadu Juventude no Desportu, Nélio Isaac Sarmento. Imajen Egas Cristovão

DILI, 9 setembru 2019 (TATOLI) – Sekretaria Estadu Juventude no Desportu (SEJD), seidauk bele autoriza Liga Futeból Amadora (LFA) atu hala’o jogu iha Estádiu Café Ermera.

Razaun seidauk autoriza tanba kondisaun kampu foin mak finalizadu no duut sira foin moris di’ak, tanba ne’e labele lai realiza jogu iha ne’ebá.

“Ita haree Estádiu ne’e foin mak hadi’a hotu. Ita tenke husik lai duut sira ne’e buras lai, haree halo didi’ak tiha lai foin bele utiliza ba jogu liga,” tenik Sekretáriu Estadu Juventude no Desportu, Nélio Isaac Sarmento ba Agência Tatoli iha Ministériu Finansa, Aitarak-Laran,  segunda ne’e.

Maibé, tuir governante ne’e, jogu Super Tasa bele hala’o iha Estádiu refere no prepara de’it ba jogu CPLP ne’ebé sei hala’o iha tinan oin.

Tanba ne’e, nia informa, jogu LFA sei hala’o nafatin iha Estádiu Munisipál Dili no Estádiu Malibaca Maliana.

Entretantu, antes ne’e, LFA liuhosi órgaun ezekutivu haruka ona karta ba Sekretaria Estadu Juventude no Desportu hodi fó autorizasaun nune’e bele hala’o jogu iha Estádiu Café Ermera.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here