Ekipa Task Force DNSAS hadi’a Kanalizasaun bee-moos. Imajen MOP-DNSAS

DILI, 09 setembru 2019 (TATOLI)Xefe Departamentu Abastesimentu, Servisu Agua no Saneamentu (SAS), Francisco Pereira Xavier, klarifika katak, bee moos ne’ebé empreza konstrusaun estrada Dili-Baucau fornese ba komunidade Hera, la’ós bee merak.

Notísia Relevante : SAS Buka Meius Fornese Bee Moos ba Konsumidór Hera

Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

Nia esplika katak, kompañia kontrasaun estrada diresaun Dili-Baucau  oferese bee moos ba komunidade Hera liu husi bee Kolam ne’ebé mak transmite husi bee posu. Signifika bee la’ós merak.

Ba ajénsia TATOLI iha nia servisu fatin, foin lalais ne’e, Francisco Pereira Xavier, hateten, iha área Rai Henek Mutin, Suku Hera nian, la’ós bee fo’er maibé bee ne’e moos nian tanba de’it komunidade sira iha ne’ebá ne’e hanoin dehan bee fo’er maibé hirak ne’e kauza husi kompañia uza karreta boot hodi kuru iha kolam ne’ebá entaun halo fo’er bee.

“Ho razaun ida ne’e ita-nia komunidade sira hanoin sira konsumu bee fo’er ,maibé iha momentu ne’ebá ne’e ami ba direitamente iha fatin ne’e no haree katak la’ós bee fo’er, maibé karreta kompañia mak kuru bee iha kolam laran entaun ema hanoin bee fo’er,” Xefe Departamentu Abastesimentu Água, Francisco Pereira Xavier, esplika tenik.

Nia hateten, bee kolam ne’e invés karreta tanke bee nian kuru direita husi bee posu karik, bee kolam ne’e moos no mós bee kolam ne’e besik loos estrada ibun no kauza husi anin hodi rai-rahun tama no ai-tahan nune’e mós movimentu transporte, tuir loloos ne’e bee kolam ne’e moos nian.

Francisco Xavier afirma tan, agora karreta bee tanke kompañia ne’e la kuru ona iha kolam laran, maibé sira ba kuru direitamente iha bee posu husi kanu boot ne’e.

“Ami mós surfei ona ba iha fatin refere ne’e katak bee rai okos ne’e iha entaun aban-bainrua komunidade aumenta ba beibeik nune’e mós fábrika HEINEKEN loke iha ne’ebá, ho maneira oinsá ami buka para uza bee ne’e hodi fornese ba komunidade sira maibé daudaun ne’e bee sei sufisiente hela ba sira-nia nesesidade bázika,” informa Francisco Xavier.

Jornalista          : Osória Marques

Editór                 : Francisco Simões

 

 

 

HAKEREK NO HATÁN

Please enter your comment!
Please enter your name here