Sekretáriu Estadu Juventude no Desportu, Nélio Isaac Sarmento. Imajen António Gonçalves

DILI, 9 setembru 2019 (TATOLI) – Kada tinan Governu liuhusi Sekretaria Estadu Juventude no Desportu (SEJD) aloka ona orsamentu ba klube sira ne’ebé hamahan-aan iha primeira no segundu divizaun Liga Futeból Amadora (LFA).

Sekretáriu Estadu Juventude no Desportu, Nélio Isaac Sarmento, informa katak orsamentu ba LFA, Governu halo ona transferénsia pursentu 100.

“Tipu apoiu ba LFA ne’e iha rua, ba operadór LFA ne’e ba ezekutivu sira hodi jere jogu no prémiu sira ita transfere hotu ona”, tenik Nélio Isaac ba Agência Tatoli iha edifísiu Ministériu Finansa, Aitarak-Laran, segunda ne’e.

Nia subliña, kona-ba klube nian halo ba parte rua hanesan primeira divizaun, ne’ebé iha etapa primeiru atu hahú klube sira tenke hatama relatóriu.

“Osan fó ona entre Primeira Divizaun no Segunda Divizaun. Iha Primeira Divizaun jogu segunda volta nian klube sira halo relatóriu ba osan prémiu jogu ne’e, ita halo ona transferénsia”, akresenta governante ne’e.

Nia esplika, klube hirak ne’ebé seidauk hetan osan prémiu jogu tanba seidauk submete relatóriu ba SEJD, mak seidauk halo transferénsia.

“Iha segunda volta ne’e klube balun mak hatama ona relatóriu no oras ne’e ita prosesa ona, maibé sira ne’ebé mak seidauk hatama relatóriu seidauk prosesa”, nia dehan tan.

Totál osan ne’ebé SEJD haraik ba LFA hamutuk $500.000 resin.

Iha LFA hamutuk klubu 8 mak kompete iha Primeira Divizaun no klubu 12 iha Segunda Divizaun.

Dezde la’o iha tinan 2015, klubu 2 mak sai ona kampiaun hanesan AD SLB (2015/2016), Karketu Dili FC (2016/2017) no Boavista Timor-Leste FC (2018/2019).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here