Ministru Agrikultura no Peska, Joaquim José Gusmão dos Reis Martins.

DILI, 09 setembru 2019 (TATOLI) – Ministru Agrikultura no Peska, Joaquim José Gusmão dos Reis Martins, rekoñese katak daudaun ne’e rekursu ne’ebé maka Ministériu Agrikultura no Peska (MAP) iha la sufisiente atu halo kontrolu ba peska ilegál. Tanba ne’e tinan-tinan sempre mosu atividade peska iha área tasi Timor-Leste nian.

“Ita nian preokupasaun maka iha área peska no agora ita hetan ona definisaun ba liña fronteira marítima definitivamente ho Australia, signifika ita nian tasi sei kle’an tan, rekursu ita nian ba ida ne’e sei menus’, ministru dehan hafoin partisipa Komité Revizaun Orsamentu Polítika 2020 iha Ministériu Finansa, Aitarak-Laran, ohin.

MAP rasik mós planeia atu koloka rekursu balun iha parte peska nian, oinsá halo servisu hamutuk ho ekipa ministériu kompetente hanesan F-FDTL no Polísia Marítima atu iha futuru bele kontrola tasi di’ak liután nune’e bele prevene peska ilegál iha tasi Timór.

“Ida ne’e importante tebes oinsá maka atu prevene peska ilegál ne’ebé daudaun ne’e kontinua mosu iha Timor-Leste”, dehan Ministru Joaquim José Gusmão dos Reis Martins.

Kona-ba rekursu hira maka MAP planeia atu koloka, ministru hateten ba kestaun ne’e iha ona planu, maibé orsamentu ne’ebé prevee ba MAP nian sei halo diskusaun, bainhira define loloos ona, sei fó prioridade ba kolokasaun pesoál hodi kontrola área peska nian.

Relasiona kombate peska ilegál no fó seguransa ba tasi, MAP iha tinan oin prioritiza hodi hola ró tolu nune’e bele halo kontrolu.

Iha parte seluk, ministru informa sobre nia prezensa iha konferénsia Oseanu Índiku ne’ebé ko’alia kona-ba seguransa tasi nian, peska ilegál no mós turizmu foin lalais ne’e (3-4 setembru) iha Maldivas, Timor-Leste ko’alia liu seguransa tasi no peska ilegál.

Governante ne’e haktuir katak país sira ne’ebé maka partisipa iha konferénsia ne’e kontente hodi rona Timor-Leste nian aprezentasaun liuliu iha área peska ne’ebé sei konsidera hanesan preokupasaun no prontu tulun Timor-Leste.

Durante estadia iha Maldivas Ministru Agrikultura no Peska hasoru malu ho nia omólogu Ministru Agrikultura no Peska no Prezidente Repúblika Maldivas hodi hametin relasaun bilaterál.

Notísia relevante : Peska Ilegál Komesa Redús Kompara ho Tinan Kotuk

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here