Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, 09 setembru 2019 (TATOLI) – Diretór Jéral Orsamentu Estadu Ministériu Finansa (MF), Januário da Gama, hatete Komité Revizaun Orsamentu Polítika (KROP) sei kruza proposta adisionál balun ne’ebé aprezenta hosi ministériu no instituisaun sira hodi asegura prinsípiu sustentabilidade fiskál.

“En termu montante proposta, ohin, ami halo diskusaun de’it ba sira-nia proposta kruza ho pakote ne’ebé Governu fahe ba sira, ne’ebé ohin ministériu save ne’e maka Ministériu Edukasaun, Juventude no Desportu no Ministériu Ensinu Superiór no ninia ajénsia sira, ne’ebé proposta ho totál orsamentu hira maka aprova ne’e, tanba sei iha forma ida apresiasaun no halo verifikasaun, entaun ekipa téknika sei kontinua atu haree proposta adisionál sira ne’e hotu”, Januário afirma hafoin remata reuniaun KROP loron dahuluk iha MF, Aitarak-Laran, ohin.

“Finalmente, loroloron ami sei atualiza informasaun sira ne’e kona-ba proposta adisionál sira, posivél ami sei kruza tanba ami tenke.sukat ho kapasidade ka limite pakote fiskál ne’ebé maka iha, tanba tenke asegura prinsípiu sustentabilidade fiskál. Ne’ebé labele konsidera proposta adisionál sira hotu hodi bele opta iha OJE 2020”, hatete Januário da Gama.

Diretór Jerál ne’e dehan hosi natureza KROP ba preparasaun OJE 2020 kompara ho esperiénsia tinan pasadu, tinan ne’e mai ho inisiativa lubuk ida maka aléinde estabelese KROP, sei iha mós komité revizaun tékniku ne’ebe sei konsentra  ba diskusaun proposta Kapitál Dezenvolvimentu no halo diskusaun mós ba iha Fundu Dezenvolvimentu kapital Umanu nian.

Iha parte Kapitál Dezenvolvimentu ninian estabelese mós Komité Revizaun Polítika ida atu halo apresiasaun no filterizasaun proposta sira antes haruka ba KROP ikus liu.

Januário esplika setór importante ne’ebé Governu konsidera prioridade ba tinan 2020 mak setór sosiál, tuir maka ekonomia, infraestrutura no ikus liu setór enkuadramentu institusionál.

“Entaun iha apresiasaun no diskusaun ne’ebé mak halo, KROP tenta halo apresiasaun hodi kruza alokasaun orsamentu ida ne’e pur setór ka la’e, no tuir duni prioridade ne’ebé Governu determina tiha ona ba orsamentu 2020. Tempu hanesan mós halo aliñamentu mós ba alvu polítiku ne’ebé Oitavu Governu Konstitusionál deside tiha ona”.

Alvu polítiku sira ne’e mak hanesan orsamentu ne’ebé maka aloka tenke kontribui ba iha kreximentu ekonómiku iha tinan 2020. Tenke kontribui ba iha kriasaun postu traballu ne’ebé kada tinan rihun 60, no kontribui mós ba alvu polítiku boot ida maka oinsá bele kontribui ba kolesaun reseita to’o iha porsentu 17 iha tinan 5 nia laran no ikus liu alvu polítiku ida ne’ebé importante mós kona-ba kontribui redusaun ki’ak iha tinan 5. Maka materiál sira ne’e maka hanesan referénsia formál ida ba iha KROP no halo apresiasaun.

Iha loron dahuluk ba apresiasaun ida ne’e, ministériu no instituisaun setór importante sira mai ho proposta adisionál no iha desizaun atu estabelese ekipa téknika ida para halo fali filterizasaun no verifikasaun para proposta adisionál sira la’ós atu iha tendénsia ida para finansia fali sira-nia mákina, maibé tenke halo kruzamentu hodi halo konfirmasaun katak proposta adisionál tenke sukat mós ho kapasidade finanseira ne’ebé iha no karik permite atu pasa, tenke kontribui ba setór no alvu polítiku sira ne’ebé determina ona husi Governu ba 2020.

Iha loron dahuluk, diskusaun no apresiasaun ba iha ministériu sira ne’ebé kontribui ba iha setór sosiál, liuliu ba iha Ministériu Edukasaun, Juventude no desportu, Ministériu Ensinu Superiór no Siénsia Kultura, no ninia instituisaun tutela sira, inklui mós ho Prokuradór Jéral Repúblika.

Notísia relevante : MF Realiza Reuniaun KROP Durante Semana Rua

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here