iklan

EKONOMIA, HEADLINE

DNTT Sei Funsiona “Parajen Provizóriu” iha Dili Laran

DNTT Sei Funsiona “Parajen Provizóriu” iha Dili Laran

Halte. Foto/Google.

DILI, 09 setembru 2019 (TATOLI) – Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva, informa DNTT planeia hodi koopera ho PNTL munisípiu Dili, liuliu Unidade Polísia Tránzitu atu funsiona fali parajen provizóriu (halte, iha inglés) nune’e motorista sira bele kumpre atu para iha fatin ne’e.

“Ami servisu hamutuk ho Polísia Tránzitu munisipiu Dili oinsá kontrola ba halte sira iha Dili laran bele garante ninian funsionamentu fali”, João dehan ba Tatoli iha Balidi, ohin.

Tanba ne’e DNTT husu ba motorista mikrolete sira bele para iha halte sira ne’e atu labele provoka engarrafamentu. Tanba dalaruma fatin sira hanesan UNTL nia oin ne’e mós rame no kauza iha rentál foto kópia no mós movimentasaun ema, tanba ne’e tenke iha konxiénsia hodi bá para iha parajen ne’e.

João Eugénio haktuir bainhira parajen sira ne’e halo, DNTT hasai ona regra katak mikrolete sira tenke para iha fatin ne’e, maibé kondutór sira maka laiha konxiénsia.

Nune’e husu tenke para iha halte ne’ebé maka harii ona tanba ne’e mós nu’udar regra tránzitu nian. Bainhira la kumpre sei hetan sansaun ne’ebé DNTT hasai ona.

Parajen provizóriu sira ne’e halo dezde 2014, hamutuk sanulu ne’ebé maka harii iha fatin diferente iha Dili laran hanesan iha UNTL nia oin rua, kampun Alor, Kaikoli (MSSI nia oin), Lesidere no fatin seluk tan ne’ebé estabelese gratuitu husi kompañia L.A.

Jornalista : Natalino Costa

Editora : Maria Auxiliadora

iklan
iklan

Leave a Reply

iklan
error: Content is protected !!