Bolseiru sira hasai foto hamutuk ho família, ANTL no mós FDCH. Foto TATOLI: Nelia Fernandes

DILI, 09 setembru 2019 (TATOLI)-Navegasaun Aéreu Timor-Leste (ANATL.EP-Air Navigation Administration of Timor-Leste) hetan atribuisaun pakote Orsamentu Jerál Estadu (OJE) 2019 husi Fundu Dezenvolvimentu Kapitál Umanu (FDCH-sigla portugés) ho osan montante rihun 50 ba Programa Bolsa Estudu, atu dezloka ba Poltekbang-Surabaya, Indonézia, hodi estuda iha Air Traffic Control na’in rua, Airport Electricity na’in rua no Airport Engineering na’in rua.

Bolseiru sira ne’e kompostu husi feto tolu, mane tolu hanesan Cristinelia Pereira dos Santos, Tiziano José Paulo dos Santos Leitão Pinto, Augusta C. de Jesus Ximenes, Edmond B.T. Klau, Isabel F. de Jesus, Miguel dos Santos. Sira na’in neen ne’e nu’udar bolseiru dahuluk no antes dezloka asina uluk termu kompromisu kontratu nian.

 “Ho nune’e bele sai nu’udar baze legál ba estudante sira ne’e, bainhira ramata sira-nia estudu tenke fila mai Timor hodi serbí ba governu, liuliu ba ANATL E.P,” Prezidente ANATL Romualdo A. S da Silva ba jornalista sira, liuhusi Konferénsia Imprensa iha Salaun  VIP (Very Importante Person), Aeroportu Internasionál Nicolau Lobatu, Comoro, Dili, ohin.

Prezidente Romualdo Silva hateten, atribuisaun bolsa estudu ne’e ANATL realiza tanba serbisu hamutuk ho FDCH hodi rekruta no mós prepara bolseiru na’in hodi kontinua estudu iha Surabaya, Indonézia.

“Hanesan lokraik ida ne’e ANATL, ASTL, husi FDCH no mós inan-aman, husi bolseiru na’in neen hamutuk iha ne’e, hanesan ita hotu hatene katak ANATL hanesan empreza públika ida  presiza prepara nia rekursus umanu atu nune’e ba futuru bele ka’er netik instituisaun ida ne’e hodi habelar no haburas ba oin,” nia konsidera.

Iha fatin hanesan, Reprezentante Sekretáriu Ezekutivu FDCH, Leila Cárceres dos Santos lori FDCH nia naran kongratula bolseiru timoroan na’in neen ne’e.

“Ita fiar katak ba oin ita sei iha nafatin kontinuasaun ba investimentu ba rekursu umanu, haktuir mós alínea ho ita-nia polítika oitavu governu nian, ne’ebé atu investe liután iha área téknika. Timor presiza duni atu investe maka’as iha área téknika, hanesan agora daudaun ita haree.

Iha biban ne’e, reprezentante FDCH ne’e mós kongratula ANATL tanba konsidera katak konsege duni identifika área espesializada, liuliu iha aero portu no navegasaun nian.

“Hanoin ba oin sei iha nafatin identifika nafatin área ne’ebé prioridade atu ita bele kontinua nafatin fó apoiu iha rekursu umanu no mós ba alin oan sira bolseiru sira ne’ebé hetan ona oportunidade, atu ba kontinua imi-nia eskola iha nasaun Indonézia ha’u hanoin ida ne’e oportunidade di’ak, hatudu imi-nia matenek no mós atitude basá ita boot na’in neen sei sai nu’udar hanesan embaixadór Timór nian ne’ebé reprezenta iha nasaun li’ur,” reprezentante Leila Cárceres fó hanoin ba bolseiru sira.

Enkuantu, iha fatin ne’e mós, Isabel F. de Jesus nu’udar bolseira ida hateten katak nu’udar sidadaun timoroan orgullu tebes ho oportunidade ne’ebé mak ANATL oferese.

“Grasa Deus ami na’in neen mak sai hanesan manan na’in ba bolseiru refere, iha nia kontinuidade mai ne’e ANATL bele prepara di’ak liután, ba alin sira ne’ebé mak sei ba kontinua sira nia estudu iha ne’ebá”.

“Esperansa ba oin ami na’in neen, bele mai serbisu hamutuk ho ANATL liuliu ba ita-nia governu, atu bele aumenta kapasidade no kualidade; espesífiku aero nian,” espera bolseira Isabel F. de Jesus.

Notísia relevante:Prepara Rekursu Umanu, ANATL Haruka Estudante Na’in-Neen Estuda iha Indonézia

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here