Ministru Reforma Lejislativa no Asuntu Parlamentár, Fidelis Manuel Leite Magalhães, hamutuk ho família vítima Masakre POLRES Maliana, halo missa no reflesaun. Imajen/Mídia MRLAP

DILI, 08 setembru 2019 (TATOLI) – Masakre Kepolisian Resort (POLRES) Maliana iha 8 to’o 10 setembru 1999 hanesan pasadu ne’ebé sai nu’udar istória negra iha prosesu ukun rasik-aan Timor-Leste nian.

Nune’e, iha 8 to’o 9 setembru tinan ne’e, família vítima sira voluntáriamente organiza-aan hodi halo misa no reflesaun atu hanoin hikas masakre ne’ebé akontese iha tinan 20 liubá.

Iha oportunidade ida ne’e, Ministru Reforma Lejizlativa no Asuntu Parlamentár, Fidelis Manuel Leite Magalhães, hamutuk ho ninia família partisipa direta reflesaun ne’e.

Governante ne’e nu’udar oan hosi saudozu Manuel Leite Magalhães de Oliveira, ne’ebé sai vítima no mate iha loron hanesan, hamutuk ho mártir sira seluk.

Iha reflesaun ne’e, Ministru Fidelis agradese no apresia tebes ba parte hotu ne’ebé enkoraja durante ne’e no esforsu nafatin hamutuk ho família vítima hodi komemora loron masakre ne’e.

“Loron ida ne’e, loron istóriku no sai loron memória ba ita hotu ne’ebé luta ba ukun-aan. Tanba ne’e ita hotu ne’ebé sei moris tenki hatene obrigadu ba sira ne’ebé fó sira nia-aan ba rai ida ne’e no kontinua sira-nia obra ho loloos no momoos hodi asegura prosesu dezenvolvimentu nasionál”, tenik Fidelis.

Nia mós husu atu labele halo istória hodi harahun futuru, maibé istória tenki sai hanesan memória ida ne’ebé bele haforte futuru.

Entretantu, relatóriu hosi Komisaun Akollimentu Verdade no Rekonsiliasaun (CAVR-sigla portugés) haktuir, ema ne’ebé mate iha POLRES Maliana, hosi loron 8 to’o 10 setembru 1999 hamutuk na’in 29.

Iha Munisípiu Bobonaro, totál ema ne’ebé mate iha setembru 1999 hamutuk na’in 111.

Relatóriu ne’e haktuir tan, iha mate isin hamutuk na’in 40 mak soe ba tasi.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here