Jogu entre Atletico Ultramar no Karketu Dili FC, iha Estádiu Munisipál Dili, iha sábadu (7/9). Imajen/Hortençio Sanchez

DILI, 7 setembru 2019 (TATOLI) – Klube estimadu Munisípiu Manatuto, Atlético Ultramar susesu halakon armada kapitál Dili alias Karketu Dili FC ho rezultadu 3-2, iha jogu kontinuasaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, sábadu ne’e.

Golu ne’ebé lori Ultramar ba vitória prodúz hosi jogadór Juanda Priatna (25) iha minutu 15, ’76, Filipe Ribeiro (4) 48, enkuantu golu Karketu marka hosi Gelvanio Alberto (10) iha minutu 77 no Rofino Gama 78.

Hosi derrota ne’ebé ekipa Matak Malirin ne’e hetan, ameasadu atu tún hikas husi zona dezpromosaun.

Haree ba rezultadu pozitivu ne’ebé Ultramar hetan, treinadór Andi Susanto espresa nia sentimentu tanba ekipa refere ladún preparadu ho di’ak maibé konsege manán ekipa ne’ebé preparadu.

“Ha’u sente kontente uituan. Ami durante ne’e ladún treinu maibé ohin hatudu rezultadu di’ak, enkuantu Karketu sira treinu lor-loron”, tenik Andi iha Estádiu Munisipál Dili.

Nia dehan, maski hela de’it jogu tolu hodi termina jogu LFA nian, maibé nia fiar sira sei esforsu atu labele tún ba zona dezpromosaun.

Iha sorin seluk, treinadór Karketu, Haryadi Hengkang, dehan nia parte la espera rezultadu mosu nune’e, tanba nia ekipa durante ne’e hala’o treinamentu másimu.

“Ami la espera ohin bele sai hanesan ne’e, maibé sei hela jogu tolu. Ami sei esforsu atu bele halo netik buat ruma”, dehan treinadór ne’e.

Jogu refere dirije hosi árbitru Nívio Fernandes, juiz liña Pedro Carvalho, Cristóvão Alves no árbitru rezerva, Jaime Gonçalves.

Iha époka ida ne’e, Ultramar hanesan ekipa ne’ebé fraku maibé konsege hamate ekipa zigante rua hanesan iha jornada primeira volta, ne’ebé konsege manán ona Karketu ho rezultadu 3-0, segunda volta manán tan Karketu 3-2, iha primeira volta manán mós Boavista FC Timor 3-2.

Ekipa rua ne’ebé Ultramar halakon iha kampiaun LFA époka 2016 mak Karketu no Boavista 2017.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here