DILI, 05 Agostu 2019 (TATOLI)- Eis-Prezidente Repúblika, José Ramos Horta relata progresu Timor-Leste nian ba ekipa delegasaun ASEAN “Fact-Finding Mission” mai Timor-Leste relasiona ho preparasaun Timor-Leste nian atu sai mós membru ba ASEAN (Organizasaun Sudeste Aziátika-sigla inglés).

Hafoin relata, Eis-Xefe Estadu, José Ramos Horta perante jornalista sira kompara katak Timor-Leste husi tinan 2002; independénsia to’o agora, ema barak mak rekoñese progresu estraordináriu ne’ebé maka Timór halo ona.

“Bazeia ba faktu no figura, iha tinan 2002 ita iha de’it doutór 19, maibé agora ita iha ona doutór 1000 resin. Uluk ita laiha rede ka enerjia ne’ebé luan, maibé agora iha ona, nune’e mós agora ema hotu bele hale’u nasaun ida ne’e no haree estrada iha ona mudansa, konstrusaun sira mós la’o daudaun ona, moras malaria komesa menus daudauk, kompara ho tinan uluk liu ba,” hateten Eis-diplomata, José Ramos Horta, iha Timor Plaza, kinta (05/09/019)

“Tinan sanulu liubá iha ema estranjeiru barak maka serbisu iha fatin-fatin, iha governu no iha ministériu sira maibé agora timoroan barak maka hasai estudu iha nasaun ASEAN barak no serbisu ona iha fatin sira ne’e,” Horta reforsa.

Prontu Tama ASEAN

Iha biban hanesan,  Lider másimu timoroan, José Ramos Horta afirma katak Timor-Leste prontu liu atu tama ASEAN, maske ita sei presiza tempu naruk atu sai hanesan nasaun ASEAN seluk, nia kompara ho Kambodia no Indonézia.

“Indonézia hanesan nasaun viziñu, indonézia mós bele ajuda Timor-Leste hodi sai di’ak liu hanesan Bali, la’ós ba turizmu de’it maibé di’ak iha administrasaun, infraestrutura no kualidade moris povu nian”.

Maske nune’e, lider timoroan ne’e rekoñese mós katak Timor-Leste seidauk susesu iha área haat ne’ebé sai hanesan dezafiu Timor-Leste hasoru iha pasadu to’o agora maka agrikultura, seguransa iha ai-han, má nutrisaun ba labarik sira.

“Nune’e iha tinan sanulu mai ita sei tau atensaun sériu liu ba agrikultura, tenke mós halakon má nutrisaun, hamenus ki’ak no oferese bee moos ba uma kain ida-idak,” nia espera.

Iha fatin hanesan, Eis-Premiadu Nobel da Paz ne’e haktuir katak durante nia aprezentasaun ba ASEAN “Fact-Finding Mission” sujere atu ekipa delegasaun ne’e bele hato’o ba sira-nia ministru no espera katak bele simu Timor-Leste sai nu’udar membru ba organizasaun aziátika ne’e.

“Importante ba ASEAN maka pás no seguransa, instituisaun governasaun di’ak. Se ita prontu atu simu todan nu’udar membru ASEAN; normál, tanba Timor-Leste hatudu ona sira-nia laran iha relasaun metin ho ASEAN, kolabora ho ASEAN sira,” nia argumenta.

Eis-Xefe Diplomasia, José Ramos Horta esplika mós katak vantajen bainhira Timor-Leste tama ASEAN maka sei iha investimentu tama husi rai boot ASEAN sira, tama barak liután no komérsiu mós sei tama liután.

“Signifika governu tenke kontinua fó apoiu ba setór privadu timoroan, maibé setór privadu timoroan labele hein de’it kontratu, timoroan hetan kontratu buka halo serbisu labele fa’an tiha fali kontratu ne’e ba Indonézia no Filipina,” nia konsidera.

Notísia relevante:Timor-Leste Partilla Informasaun Kona-ba Dezenvolvimentu Ba Ekipa Delegasaun “Fact-Finding Mission”

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here