Xefe Departamentu Marketing hosi Operadór Telekomunikasaun Ceslink, Moniz Maia. Foto/Zezito Silva.

DILI, 05 setembru 2019 (TATOLI)-Infraestrutura telekomunikasaun Ceslink iha Dili atinje ona porsentu 95, tanba ne’e iha novembru ka dezembru operadór telekomunikasaun ne’e sei halo lansamentu ofisiál iha Dili.

Xefe Departamentu Marketing Ceslink, Moniz Maia, hatete hanesan operadór telekomunikasaun ne’ebé sei iha prosesu dezenvolvimentu infraestrutura ne’ebé sei lansa iha tinan ne’e, halo mós expansaun ba munisípiu iha inísiu 2020.

“Ceslink hahú iha 2018, ita harii ona infraestrutura ba telekomunikasaun nian, infelizmente infraestrutura sei iha Dili de’it, maibé expansaun sei to’o munisípiu hotu iha inísiu 2020 depois ita halo lansamentu ofisíal”, Moniz Maia informa ba Tatoli iha nia serbisu fatin, Bidau, ohin.

Infraestrutura ne’ebé Ceslink halo maka torre iha Dili laran, Manatutu inklui Likisá, no iha kapitál kuaze perkorre ona hanesan iha Ai-Mutin, Hudi-Laran, Kristu Rei, no Marabia.

“Torre ita tau hotu ona, atu ita-nia kobertura bele másima kompara ho ita-nia operadór sira ne’ebé agora eziste hela”, katak.

Tanba ne’e Ceslink nia prezensa sei la lori buat ne’ebé hanesan ho operadór tolu ne’ebé iha ona, nune’e prepara infraestrutura tenke másima atubele fó satisfasaun di’ak ba konsumidór sira iha Timor-Leste.

Maibé antes lansamentu, Ceslink sei lansa publisidade liuhosi meiu hothotu atu públiku hatene telekomunikasaun nia ezisténsia.

“Ita sei fó sai publisidade ba timoroan katak ida ne’e maka prezensa Ceslink hanesan operadór nasionál ne’ebé bele oferese serbisu telekomunikasaun ne’ebé di’ak no kualidade ba konsumidór iha rai-laran, tantu ema estranjeiru sira mai Timor-Leste”, salienta.

Enkuantu, Ceslink nia prezensa hodi foti risku tanba hakarak atu kompete ho operadór tolu, tanba iha tinan ida liubá Ceslink halo ona market supply ka fornesedór merkadu katak iha posibilidade boot atu tama iha termu rede no presu. Tanba ne’e maka garante Ceslink nia ezisténsia mós sei kompete ho sira ne’ebé antes ne’e iha ona, maibé kompete ho ida ne’ebé saudavel.

Ceslink garante katak sei fornese serbisu telekomunikasaun ne’ebé kualidade di’ak no asesivel iha termu presu nian.

Timor-Leste iha ona operadór telekomunikasaun tolu maka Timor Telecom (TT), Telemor, Telkomcel, enkuantu iha tinan ne’e bainhira halo lansamentu ba Ceslink, signifika operadór telekomunikasaun iha rai ida ne’e hamutuk haat.

Notísia relevante : Governu Aprova Investimentu Operadór Telekomunikasaun Ceslink

Jornalista : Zezito Silva 

Editora : Maria Auxiliadora

3 KOMENTÁRIU

HAKEREK NO HATÁN

Please enter your comment!
Please enter your name here