Diretór Ezekutivu TIC Timor, Roberto Caetano de Sousa Vicente. Imajen Egas Cristovão

DILI, 05 setembru 2019 (TATOLI)–Diretór Ezekutivu Teknolojia Informasaun no Komunikasaun (TIC, Sigla Portugés), Roberto Caetano de Sousa Vicente, informa TIC dezeña ona portál úniku Governu nian ne’ebé atinje ona ho porsentu 80.

“Ami hahú dezeña portál úniku Governu no atinje ona porsentu 80, espera katak finál ba tinan ne’e bele lansa ona”, dehan Roberto Sousa ba Ajénsia Tatoli iha nia serbisu fatin, Palásiu Governu, ohin.

Roberto hatutan bainhira portál ne’e atinje ona porsentu 100, signifika Governu iha ona portál ida de’it, katak ema hatene de’it portál ida bainhira atu asesu ba serbisu ne’ebé Governu oferese ka informasaun Governu nian hotu.

Ezemplu, lembra de’it website ida, iha ne’ebá bele haree informasaun hotu hosi Ministériu Justisa, Ministériu Edukasaun no seluk tan, signifika informasaun iha fatin ida de’it.

Nia akresenta bainhira Governu iha portál úniku, ema hotu bele asesu kualkér serbisu ne’ebé oferese ba públiku.

“Ami uza sistema ne’e atubele responde nesesidade ema hotu nian, ami mós halo aplikasaun buka serbisu nian hodi identifika nesesidade serbisu ne’ebé ema buka barak liu, nune’e Governu bele hetan informasaun klara katak kada tinan ema buka serbisu na’in hira, serbisu saida maka ema presiza barak liu”, katak.

Dezeña ba portál úniku ne’e hosi TIC rasik atubele hafásil públiku bele hetan informasaun lalais iha fatin ida. Ne’ebé prevee iha enkuadramentu dalimak nian, oinsá atu haree prosesu negósiu ho sistema informasaun, iha ne’ebé TIC bele solusiona ba instituisaun Estadu nian liuliu prestasaun serbisu públiku.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here