Primeiru-Ministru, Taur Matan Ruak. Imajen Tatoli/António Gonçalves

DILI, 5 setembru 2019 (TATOLI)—Primeiru-Ministru (PM), Taur Matan Ruak, hato’o parabéns no agradese ba mídia nasionál no internasionál ne’ebé halo kobertura ba Komemorasaun Tinan 20 Konsulta Populár foin lalais no mós prezensa misaun INTERFET.

PM hato’o parabéns ne’e hafoin hala’o enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Ha’u hakarak fó parabéns ba jornalista sira hotu, tanba imi halo kobertura ba ita-nia serimónia di’ak tebes. Transmite mós ha’u-nia parabéns ba imi-nia xefe sira”, Taur hateten.

Nia salienta, hanesan Primeiru-Ministru, sente kontente teb-tebes ho serbisu jornalista sira-nian, liliu iha eventu importante ne’ebé timoroan hotu foin komemora.

Entretantu, tuir lista hosi komisaun organizadora ne’ebé TATOLI asesu katak mídia nasionál sira ne’ebé durante ne’e halo kobertura ba eventu ne’e mak hanesan Agência Noticiosa de Timor-Leste TATOLI.IP, RTTL.EP, GMN TV, TVE-T, Rádiu no Televizaun Maubere (RTM), Gardamor TV, Jornál Independente, Jornál Timor Post, STL, Dili Post, Business Timor, Rádiu Timor Kmanek, Tempo Timor, Rádiu Voz, Mídia One Timor no Rádiu Komunidade sira.

Aleinde ne’e, mídia internasionál sira mak hanesan Reuters, The Associated Press, Kyiodo News Agency, Agência Lusa, Sydney Morning Herald, 7 News Austrália, BBC, Sky News, Australia Broadcasting Cooperation, Fiji Sun News no seluk tan.

Parabéns ba Komisaun Organizadora

Iha ámbitu hala’o enkontru semanál ho Prezidente Repúblika (PR), Francisco Guterres Lú Olo, PM Taur informa situasaun serimónia Komemorasaun Tinan 20 Konsulta Populár no prezensa misaun INTERFET katak buat hotu la’o di’ak ka kapa’as.

Iha oportunidade ne’e, Xefe Governu hato’o parabéns no agradese ba Komisaun Organizadora ba apoiu, kontribuisaun nune’e serimónia bele la’o di’ak iha nível munisipál  no mós kapitál.

Aleinde ne’e, Taur informa mós ba PR kona-ba Komisaun Revizaun Orsamentu Jerál Estadu tinan 2020, sei halo diskusaun iha loron 9 fulan ne’e to’o ramata.

Ikus liu, nia informa mós ba PR prezensa delegasaun ASEAN nian, ne’ebé oras ne’e iha ona Timor-Leste atu halibur dadus kona-ba dezenvolvimentu liga ho adezaun Timor-Leste ba ASEAN.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here