DILI, 05 setembru 2019 (TATOLI)-Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, orienta ona ba Institutu Nasionál Dezenvolvimentu Mão de Obra (INDMO), Sentru Formasaun Senai Bekora no Tibar atu tuur hamutuk halo planu hodi estabelese sentru formasaun integradu iha 2020.
“Ha’u fó orientasaun ona ba sentru treinamentu Tibar no Senai Bekora atu tuur ho SEFOPE atu haree didi’ak ho kle’an hodi halo proposta ida hodi avansa ho sentru formasaun ka treinamentu integradu ka sai ida de’it”, atuál Ministru Reforma Lejizlativa no Asuntu Parlamentár hatete iha edifísiu TradeInvest, Kolmera, ohin.
MKAE internu ne’e dehan, polítika Governu hakarak sentru formasaun Tibar no Senai Bekora sai ida de’it atu fásil konsentra rekursu umanu liuliu hadi’a kualidade treinadór sira no mós finansiamentu ne’ebé Governu aloka ba fatin ne’e atu hasa’e kualidade formasaun ba sidadaun sira atu hetan servisu.
Nune’e tenke haree didi’ak polítika ida ne’e hodi bele avansa ka implementa iha tinan oin.
“Ita hakarak sentru formasaun sira rejistu klaramente sira-nia kontribuisaun ba setór la’ós mina-rai no ema hira mak sira treinu no hetan ona empregu ema hira”, Fidelis haktenik.
Aleinde ne’e, MKAE internu ne’e mós orienta ba INDMO atu kontrola no apoia sentru formasaun iha territóriu laran atu hasa’e kualidade formasaun hodi prodús rekursu umanu tuir meta Oitavu Governu Konstitusionál ho baze ba Planu Estratéjiku Dezenvolvimentu Nasionál (PEDN).
Jornalista : Florencio Miranda Ximenes
Editora : Maria Auxiliadora
