Ministru Justisa, Manuel Caárceres da Costa, selebra loron konsulta populár ba dala-20 (30 agostu 1999-30 agostu 2019) ho dadur sira iha Prizaun Becora, kuarta (04/09/2019). Imajen/Mídia GMJ

DILI, 05 sept 2019 (TATOLI) –Ministru Justisa, Manuel Cárceres da Costa, husu ba Diretór Estabelesimentu Prizaun Becora, João Domingos, atu muda tan dadur purvolta na’in 30 ba Prizaun Suai hodi hamenus númeru dadur sira iha Prizaun Becora ne’ebé resin ona (over capacity).

Notísia Relevante: Dadur 45 iha Becora Transfere ba Prizaun Suai

Prizaun Suai sei bele simu tan dadur 30 tanba ne’e,  ha’u ko’alia ho Diretór Estabelesimentu Prizionál Becora nian atu identifika fali maluk sira atu bele muda tan dadur 30 ba Suai no na’in haat ba Gleno,” informa Manuel Cárceres da Costa ba Jornalista sira iha Prizaun Becora, kuarta (04/09/2019).

Dalan seluk atu hamenus over capacity iha Prizaun sira maka Governu hanoin ona atu implementa kódigu penál ne’ebé fó dalan atu halo serbisu afavór ba komunidade.

“Kazu ki’ik oan sira ne’e la presiza mai to’o Tribunál hodi tama prizaun maibé presta de’it servisu ba ninia komunidade para nia komunidade hatene ninia kastigu ne’e maka halo fali servisu di’ak ida ba ninia komunidade, porezemplu kazu hadau mai ai-horis iha rai ketan depois basa malu la rezulta kauza moras todan ka kanek todan,” esplika Ministru Manuel Cárceres.

Governante ne’e dehan, sei konsulta ho jurista Timoroan sira kona-ba lei kódigu penál ne’e hodi implementa iha futuru.

Tuir Nia, prevensaun krime iha sosiedade nia leet mós kontribui ba estadu atu hamenus númeru dadur sira iha prizaun.

“Husu ba sosiedade Timoroan hotu atu iha konsiente hodi hakribi violénsia no krime,” afirma Ministru Manuel Cárceres.

Hatán jornalista kona-ba polítika Governasaun da-ualu atu estabelese tan prizaun foun, governante ne’e dehan, Governu seidauk iha planu atu kria tan komarka foun, maibé presiza atu reforma iha prevensaun krime  iha sosiedade nia leet.

Prizaun Suai daudaun ne’e akumula dadur purvolta atus ida. Maibé, iha Prizaun Becora akomula prezu na’in 600 no iha Gleno purvolta atus ida resin.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here