Ekipa Esploratória ASEAN hasai foto hamutuk ho reprezentante povu sira iha Parlamentu Nasionál. Imajen Tatoli/ Evaristo Soares Martins

DILI, 5 setembru 2019 (TATOLI)—Lei no lejizlasaun ne’ebé eziste iha Timor-Leste (TL) sai pilár  importante ba Timor-Leste nia adezaun ba Asosiasaun Nasaun Sudeste Aziátiku (ASEAN-sigla inglés).

Kestaun ne’e relata iha ámbitu membru Parlamentu Nasionál hasoru malu ho Misaun Esploratóriu ASEAN nian komposta hosi nasaun membru 10 mai iha Timor-Leste hodi halo avaliasaun kona-ba Timor-Leste nia prontidaun atu sai membru permanente ASEAN nian iha futuru.

“Iha hasoru malu partilla informasaun ba malu no liga mandatu Parlamentu nian ne’ebé aprova lei no lejizlasaun sira, aprova orsamentu no programa no halo fiskalizasaun. Bazeia ba ida ne’e ami partilla Timor-Leste nia kompromisu sai membru ASEAN nian, liliu liga ho mandatu Parlamentu nian atu haree kona-ba lei sira, parte hosi VIII Governu Konstitusionál nia prioridade mak halo reforma ba lejizlativa sira ne’ebé la konformidade ho ita-nia situasaun bainhira ita implementa lei sira ne’e”, Vise Prezidente Parlamentu Nasionál, Maria Angelina Sarmento, ba jornalista sira, hafoin hasoru malu ho ekipa refere iha Parlamentu Nasionál, kinta ne’e.

Maria Angelina dehan lei sira ne’ebé halo alterasaun iha reforma ne’e iha konformidade ho enkuadramentu legál sira ASEAN nian, tanba lei sira aplika iha nasaun ne’e tenke fó benefísiu mós ba ema sira ne’ebé  mak mai hosi rejiaun ASEAN nian.

Nia hatutan, iha hasoru malu ne’e ko’alia kona-ba setór ekonomia, saúde, sosiál, edukasaun, turizmu no komérsiu, tanba setór hirak ne’e mak atu haforsa atividade ekonómiku, ne’ebé parte ida hosi objetivu ASEAN nian.

Nia haktuir, parte ida Timor-Leste atu responde ba asuntu polítiku no asuntu tékniku mak liuhosi Ministériu Negósiu Estranjeiru konsege harii ona edifísiu diplomátiku iha embaixada sira iha nasaun 10 membru ASEAN.

Nune’e, deputada ne’e tenik, ba futuru, téknikamente Timor-Leste bele responde ona ba reuniaun barak ne’ebé konvoka hosi ASEAN iha tinan ida nia laran.

“Sira hato’o de’it sira-nia pergunta, maibé nasaun balun mós demostra sira-nia kompromisu no sira-nia apoiu hanesan Brunei dehan katak dezde uluk kedas sira apoiu Timor-Leste, Indonézia foin lalais liuhusi sira-nia deklarasaun polítika sira apoiu tebes Timor-Leste nia adezaun. Só nasaun ida ka rua tan mak sei kestiona hela Timor-Leste nia prontidaun atu sai membru ASEAN, maibé restu hosi nasaun 10 ne’e prontu ona atu simu Timor-Leste”, katak nia.

Nia afirma, Timor-Leste prontu ona sai membru ASEAN, tanba ida ne’e la’ós nível polítika nasionál mak hatene kona-ba benefísiu sai membru ASEAN.

“Iha área rurál povu Timor-Leste barak mak kompriende ona benefísiu sai membru ASEAN, liliu tinan hirak liu-ba Ministériu Negósiu Estranjeiru halo sosializasaun no divulgasaun informasaun kona-ba Timor-Leste nia adezaun”, hateten Vise Prezidente Parlamentu Nasionál ne’e.

“Povu barak prontu. Agora, la’ós pergunta oinsá mak tama ASEAN maibé bainhira mak tama ASEAN. Ita la hato’o proposta, maibé ita dehan de’it katak reuniaun ne’e bele iha impresaun pozitiva atu sira bele elabora sira-nia relatóriu no foti desizaun polítika kona-ba bainhira mak Timor-Leste sai membru permanente ASEAN,” Maria Angelina hatutan.

Ekipa hosi Misaun Exploratória ASEAN 2019 mak hanesan Sekretáriu Permanente/Xefe Delegasaun hosi Tailándia, Busaya Mathelin; Vise Ministru Relasaun Exteriór Vietname, Nguyen Quoc Dong; Sekretáriu Permanente Brunei Darrussalam, Emaleen Abdul Rahman Teo; Sekretáriu Estadu Kambodia, Kan Pharidh; Reprezentante Repúblika Indonézia ba ASEAN, Ade Padmo Sarwono.

Nune’e mós, Vise Ministru Relasaun Exteriór Laos, Thongphane SAVANPHET; Ministru Relasaun Exteriór Malázia, Dato Muhamad Shahrul Ikram Bin Yaakob; Diretór Jerál Asuntu ba ASEAN Myanmar, Hau Khan Sum; Sekretáriu Relasaun Exteriór ba Polítika Filipina, Henrique Austria Manaio no Sekretáriu Permanente, MFA (Ministry of Foreign Affairs) Singapura, Chee Wee Kiong.

Ekipa Exploratória ASEAN akompaña mós hosi Adjuntu Sekretáriu Jerál ASEAN, Hoang Ang Tuan.

Enkuantu, ekipa Ministériu Negósiu Estranjeiru no Kooperasaun (MNEK) Timor-Leste nian, mak hanesan Diretór Jerál ba ASEAN, Domingos Savio, Diretora Sósiu-Kulturál ba ASEAN, Madalena Viegas, Primeiru Sekretáriu Embaixada RDTL iha Jakarta, Manuel da Costa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here