Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 05 setembru 2019 (TATOLI)-Governu liu husi Ministériu Solidariedade Sosiál no Inkluzaun (MSSI),  sei kria uluk kondisaun ba ema ho defisiénsia atu  asesu iha Edukasaun, Saúde, transporte, telekomunikasaun  ho di’ak liután antes  ratifika konvensaun internasionál ba ema ho defisiénsia.

Notísia Relevante: ADTL Husu Ba Governu Atu Ratifika Konvensaun Direitu EHD

“Presiza kria  kondisaun  ba asesibilidade ema ho defisiénsia, intermus asesibilidade ho di’ak  ba edukasaun, saúde, justisa,  transporte, komunikasaun,  estrada, no seluk tan nune’e ratifika karik labele prejudika ema ho defisiénsia nia direitu,” esplika Diretór Jerál MSSI, Rui Manuel Gago Exposto, hodi responde Ajénsia TATOLI, ohin, iha ninia servisu fatin, Edífisiu MSSI,  Caicoli, Dili.

Atu kria kondisaun hirak ne’e, Rui Exposto hateten, MSSI konsentra uluk ba  konsultasaun planu asaun nasionál  ba ema ho defisiénsia  ba periodu 2020-2024 hodi involve liña ministeriál no instituisaun privada.

Notísia Relevante : Governu Konsidera Ejijénsia ADTL Kona-ba Ratifikasaun Konvensaun Direitu EHD

Nia haktuir liña ministeriál ne’ebé MSSI involve iha konsultasaun públiku ne’e maka Ministériu Edukasaun Juventude no Desportu (MEJD), Ministériu Transporte no Komunikasaun (MTK),Ministériu Obras Públikas (MOP), Sekretáriu Estadu Juventude no Desportu (SEJD) no seluk tan.

Diretór Jerál MSSI, Rui Manuel Gago Exposto, hatete, atu presta asisténsia di’ak liután ba ema ho defisiénsia la’ós kna’ar no responsabilidade MSSI nian de’it, maibé liña ministeriál hotu, tanba ne’e, liu husi konsultasaun públiku  ne’e ministériu ida-idak bele tau orsamentu ba iha servisu refere.

Maske governu seidauk iha desizaun finál ida   hodi ratifika ona  konvensaun internasionál ba ema ho defisiénsia ne’e,  maibé Diretór Jerál MSSI fiar katak  sei  ratifika iha futuru.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here