Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva.

DILI, 05 setembru 2019 (TATOLI)-Diresaun Nasionál Transporte no Terrestre (DNTT) Ministériu Transporte no Komunikasaun (MTK) planeia atu iha futuru aplika taxa ba transporte privadu sira.

Xefe Departamentu Sinál no Tráfiku DNTT, João Eugénio da Silva, dehan durante ne’e aplika de’it administrativamente ba transporte privadu hanesan fulan ne’e maka bá selu lisensa.

“Sira mai selu ne’e la’ós taxa, maibé selu karreta nian KIR (dokumentu inspesaun), mai check karreta nian kondisaun de’it no selu administrasaun de’it”, João Eugénio hatete iha Balidi, ohin.

Nia dehan, iha Timór família ida iha karreta rua tolu no motór lima, neen, tanba laiha taxa transporte nian. “Se ita kompara ho rai seluk hanesan iha Singapura, Indonézia no Austrália, ema iha karreta ida nia tenke selu taxa tinan-tinan”.

Ba kestaun sira ne’e maka bá oin DNTT tenke aplika ona taxa ba transporte, nune’e ema bele kumpre para meiu ida atu halo redusaun ba transporte iha família ida.

“Ida ne’e ezije ita prefere liu uza transporte públiku duké transporte privadu, nune’e ba futuru engarrafamentu iha Dili laran menus”, hatete João Eugénio.

Papél DNTT maka atu tau-matan ba transporte sira, oinsá la’o di’ak iha kapitál laran, labele kauza engarrafamentu no mós labele provoka volume insidente ne’ebé maka’as.

Tanba tuir estudu komparativu sira ne’ebé DNTT halo ona iha rai-li’ur hanesan Singapura, implementa ida ne’e no ema uza liu transporte públiku kompara privadu.

Nune’e DNTT rasik sei tau iha planu prioridade karik presiza lejizlasaun ruma prontu kontribui hanoin ba kestaun ne’e.

“Ami sei hato’o proposta ida ne’e ba Ministériu Transporte atu impoin mós ba iha planu no prioridade tinan oin ka tolu mai, maibé buat sira ne’e hotu depende ba desizaun polítiku nivel altu sira nian”, tenik João Eugénio.

Jornalista : Natalino Costa

Editora : Maria Auxiliadora

2 KOMENTÁRIU

  1. Sr. Nia hanoin ne kapas no furak maibe ten que Prepara mos kondisaun ba transporte publiku mak bele implementa lei refere. Tanba iha Rai liur ita boot sira halo estudu komparativu ema nia transporte publiku ne mais avansado kompara ho ita nia.Obrigado.

  2. Diak liu planu uluk konaba oinsa bele kria kondisaun transporte publiku neebe diak liu antes atu implementa taxa ba transporte privadu.

HAKEREK NO HATÁN

Please enter your comment!
Please enter your name here