Ministru Justisa, Manuel Cárceres da Costa,simu prenda husi Diretór Estabelesimentu Prizaun Becora, João Domingos, bainhira selebra festa konsulta populár hamutuk ho dadur sira iha Prizaun Becora, kuarta (04/09/2019). Imajen/Mídia GMJ

DILI, 05 setembru 2019 (TATOLI)-Governu liu husi Ministériu Justisa,  Kuarta (04/09/2019), komemora loron konsulta populár ba dala-20 hamutuk ho dadur na’in  600  iha Prizaun Becora, Dili.

Ministru Justisa, Manuel Cárceres da Costa, hatete, komemorasaun loron konsulta populár importante hodi hanoin hikas tinan 20 liubá, oinsá maioria povu Timor-Leste ho korajen no aten brani termina Timor nia destinu  liu husi konsulta populár, 30 agostu 1999.

Governante ne’e dehan, atu aselera prosesu dezenvolvimentu Timor-Leste konta mós ho apoiu husi dadur sira nian,  tanba ne’e,  husu atu hadia aan hodi hakribi violénsia.

Manuel Cárceres,  dehan,  prizaun la’ós fatin atu kastigu de’it, maibé  fatin atu halo reflesaun hodi re-konstrusaun mentalidade no karakterístika ne’ebé at atu sai ema di’ak liu bainhira fila ba família no sosiedade nia leet.

 “Fatin ida ne’e la’ós fatin kastigu, maibé re-konstrusaun mentalidade hodi hadi’a hahalok at sira atu  sai ema di’ak,” hateten Ministru Manuel Cárceres da Costa.

Iha fatin hanesan Diretór Estabelesimentu Prizaun Becora, João Domingos, informa, prizaun Becora hetan apoiu orsamentu $3.000 husi komisaun organizadora ba komemorasaun tinan 20 konsulta populár.

“Total orsamentu ne’ebé aloka ba prizaun tolu (Becora, Gleno no Suai) hamutuk dolar amerikanu rihun hitu resin,” esplika diretór ne’e.

Dadur sira iha Prizaun Becora komemora loron istóriku ne’e,  ho atividade desportivu hanesan Futeból, voleiból, Tenis Meja, Cagres, doasaun ran ba Ospitál Nasionál Guido Valadares (HNGV-sigla Portugés) no simpóziu artezanatu hanesan pinta.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here