Komandante Jerál PNTL, Faustino da Costa, ho nia Adjuntu dadalia ho jornalista sira iha Palásiu Prezidente Nicolau Lobato. Imajen/Cipriano Colo

DILI, 5 setembru 2019 (TATOLI) – Durante fulan agostu,  tinan ne’e, Komandu Polísia Nasionál Timor-Leste (PNTL) rejista kazu asidente hamutuk 137.

Hosi kazu hirak ne’e, rezulta na’in lima mate, na’in 31 kanek todan no na’in 155 kanek kamaan.

Komandante Jerál PNTL, Komisáriu Faustino da Costa relata dadus hirak ne’e ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, durante enkontru semanál iha kinta ne’e.

Faustino hateten perante situasaun ne’e, PNTL ho kbiit tomak, halo atendimentu másimu kazu hirak ne’e.

Aleinde asidente, iha mós insidente balun, inklui prega multa koin ba infrasaun sira ho nia númeru boot tebes, ne’ebé maioria neglijénsia ema-nian, hanesan kondúz laiha karta kondusaun, la lori dokumentu transporte viatura ninian inklui kapasete.

Hosi pregasaun multa ne’e, PNTL konsege hatama reseita ba Kaixa Jerál Estadu iha fulan agostu hamutuk $19.000 resin.

Ho situasaun ne’e, komandu mós halo reflesaun hodi hanoin katak, ba oin, sei implementa programa ida kona-ba risku no efeitu.

“Duké ba iha eskola sira, komunidade, autoridade lokál no entidade sira seluk ko’alia kona-ba artigu, di’ak liu halo buat seluk”, Faustino hateten.

Programa ne’ebé komandu sei lansa mak ‘kultura hadomi vida’, ho nia konteúdu katak sensibiliza oinsá lori transporte tuir regra hodi assegura vida.

Hosi númeru asidente no infrasaun hirak ne’e, Faustino hateten la inklui iha festa Komemorasaun Konsulta Populár, tanba durante serimónia la akontese buat ruma no serimónia ne’e la’o ho susesu.

Tanba ne’e, Prezidente Repúblika apresia ho serbisu PNTL nian no husu komandu atu transmiti apresiasaun ne’e ba membru sira iha territóriu tomak.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here