Primeiru-Ministru Taur Matan Ruak simu eis Embaxadora Portugal ba Indonezia, Ana Gomes, iha Palacio Governu, Kinta 5 Setembru 2019. Imajen/Antonio Goncalves.

DILI, 05 setembru 2019 (TATOLI)-Eis Embaixadora Portugál ba Indonézia, Ana Gomes, hasoru Primeiru-Ministru (PM), Taur Matan Ruak, hodi hato’o felisitasaun ba Xefe Governu no povu Timor-Leste ne’ebé maka komemora ona aniversáriu ba dala-20 Konsulta Populár no aprezenta mós projetu ida ba kona-ba “Papél Eroiku” nian, iha ne’ebé sei ko’alia kle’an sobre envolvimentu Timór nian iha funu mundiál.

“Biban ne’e ha’u mós hato’o ba Primeiru-Ministru kona-ba projetu ida ha’u ho realizadór sinema Francisco Comacho sei halo filme iha Timor-Leste kona-ba Papél Eroiku durante rezisténsia mai hosi okupasaun Japoneza, durante funu mundiál ne’ebé timoroan kuaze rihun 50 mate no halo serbisu ida fantástiku ne’ebé mak benefisia Austrália”, dehan Ana Gomes hafoin enkontru ho PM iha Palásiu Governu, ohin.

Projetu ne’e sei hala’o iha Timór, nune’e bele hatudu ba povu Timór kona-ba papél durante funu mundiál, sei finansia hosi Rádiu Televizaun Portugés (RTP) no projetu ne’e sei envolve mós timoroan sira, nune’e mós hosi australianu.

“Bainhira ha’u aprezenta projetu ne’e ba Primeiru-Ministru, nia lori povu Timor-Leste hato’o katak sente kontente tebes, no tau konsiderasaun tebes ba projetu. Tanba ne’e Governu apoia tebes no ha’u espera katak ne’e sai hanesan razaun ida atu ha’u filafali mai Timór”, afirma Ana Gomes.

Ana Gomes salienta daudaun ne’e prepara ona no tuir planu sei realiza iha tinan oin, maibé iha preparasaun ne’e serbisu barak maka sei halo hanesan arranja sasán sira ne’ebé antes ne’e iha, tenke kria fali ambiente ne’ebé iha momentu 1942-194. Tanba ne’e maka serbisu barak tebes hanesan, verifika ba edifísiu no imajen sira, nune’e mós autór ba filme no sei presiza fasilidade barak.

Embaixadora dahuluk Portugál nian ba Indonézia ne’e garante katak timoroan barak mós iha ona esperiénsia ba realizasaun filme ninian.

Tuir planu projetu ne’e sei halo lansamentu iha tinan 2020 no sei aprezenta filme ne’e iha televizaun iha 2021 no iha 2022 sei hatudu mós iha ámbitu komemorasaun ba restaurasaun independénsia Timor-Leste nian iha 20 Maiu.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here