COVALIMA, 04 setembru 2019 (TATOLI) – Sobrevivente balun husi trajédia asasinatu Setembru negro 1999 iha Suai, Covalima, presiza Estadu nia atensaun tanba sira barak mak sofre maka’as fizikamente to’o la bele kaer servisu todan.
Sobrevivente sira la husu Estadu atu fó osan boot, maibé haree no tau matan netik ba hirak ne’ebé agora alezadu, tuur de’it no la bele kaer servisu todan tanba hetan taa ka sona husi milisia pro-autonomia husi grupu Laksanakan Sapu Rata (LAKSAUR).
Apolinário Verdial, dada lia ho TATOLI iha Covalima, tersa (03/09/2019), haktuir, tanba hakarak ukun rasik aan sira halo posivel hotu atu bele atinje objetivu, maibé la espera grupu boot ida taa nia liman kabun ho kotuk laran.
“Ha’u la mate no koko atu halai ba iha merkadu kotuk no oin halai mak monu iha rate, depois kolega sira lori ha’u ba Igreja Ave Maria Suai.
Bainhira, too iha Igreja Amu matebian Hilario Madeira haruka joven balun lori ba ospitál Santo Paulus, Audian no hetan tratamentu husi doutór Teo ho madre sira seluk tan,” nia konta tuir.
Momentu ne’ebá tropa Indonézia (TNI-sigla indonézia) no Administradór Munisípiu ka tempu ne’ebá bolu Bupati ho naran Herman Surianto mós ba tuir kedas hodi haree nia kondisaun saúde, maibé joven sira la fó lisensa atu sira tama ba ospitál laran.
Nia dehan, maske ho kondisaun grave no suku iha pontu kuaze 100 resin, no labele hela baixa iha ospitál tanba milisia sira buka tuir nafatin.
Nia husu ba estadu TL atu fó netik kontribuisaun ruma ba ninia família, tanba labele halo servisu todan, maske nune’e buat ne’ebé importante mak Timor Leste ukun aan ona.
“Ema sira taa ami no oho maluk sira iha trajédia negro 1999 iha Suia ne’e, oras ne’e, iha hotu ona timor osidentál,” hateten Apolinário Verdial.
Jornalista: Domingos Piedade Freitas
Editór: Francisco Simões
