Drum Band husi eskola Sekundaria sira anima iha marsa ba dame husi Otél Timor nia oin to'o CCD. Imajen/Osória Marques

DILI, 4 setembru 2019 (TATOLI)-Estudante Eskola Sekundária Anur ho Eskola  São Miguel, orgullu tanba hetan oportunidade no fiar husi Komisaun Organizadora ba Festa Konsulta Populár (30 agostu 1999-30 agostu 2019) atu anima povu Timor-Leste iha Dili laran liu husi atividade drum band.

Notísia Relevante : Rezultadu Referendu 1999: Timoroan 344.580 Rejeita Otonomia

Hahú festa konsulta populár ne’ebé konsentra iha Tasi Tolu, Dili, to’o ohin, hanoin hikas publikasaun rezultadu konsulta popular, 4 setembru 1999, estudante sira husi nivel oioin, inklui Estudante sira  Eskola Sekundária rua ne’e ativu tebes hodi anima komunidade internasionál no povu timorense iha sira nia maneira no abilidade toka ou dere drum band.

Koordenadór Eskola Sekundária Anur Kampung Alor, Dili, Tito Miranda.

Koordenadór Eskola Sekundária Anur Kampung Alor, Dili, Tito Miranda,  agradese ba Maromak no ba eroi sira, inklui lider sira hotu ne’ebé dedika sira nia vida tomak ba luta libertasaun povu ida ne’e nian hodi ohin lorin sira estudante bele moris iha liberdade hanesan nasaun no estadu soberanu.

“Kontente tebes goza independénsia ida ne’e, maske buat balun sei falta mas ita ukun-an ona,” hateten Tito Miranda iha ámbitu hanoin hikas rezultadu referendu ne’ebé fó sai husi Sekretáriu Jerál Organizasaun Nasoins Unida (ONU), Kofi Annan, iha 4 setembru 1999.

Koordenadór Eskola Sekundária São Miguel, Jecy Nevez.

Iha fatin hanesan Koordenadór Eskola Sekundária São Miguel, Jecy Nevez, dehan, istória importante ba jerasaun foun sira. Tanba ne’e, liu husi eventu komemorasaun sira hanesan ne’e bele fó lisaun ba jerasaun foun sira kona-ba Timor-Leste nia prosesu luta ba libertasaun.

“Orgullu tebes ba loron ohin, dahuluk tenke apresia ba mate restu sira  ne’ebé mak la hamutuk ona ho ita iha mundu no daruak mak husu estudante sira labele koko haluha istória pasadu hodi prezerva nafatin istória atu hametin nasionalizmu no patriotizmu,” Jecy Nevez hateten.

Jacy Nevez, ohin, hamutuk ho nia kolega sira anima bainaka internasionál ho nasionál, inklui komunidade lubun iha Otél Timor nia oin ho sira nia trasaun drum band ne’ebé furak no fantástiku.

Marsa ba Dame husi estudante eskola sekundaria sira. Imajen/Osória Marques

Eskola São Miguel apresia tebes ho fiar hotu ne’ebé Estadu ne’e fó ba Estudante sira São Miguel nian atu anima bainaka sira iha ámbitu hanoin hikas loron konsulta populár, liu husi marsa ba dame.

Estudante sira halo marsa husi Otél Timor nia oin to’o iha Centro Convenções Dili (CCD), ne’ebé hola parte mós husi bainaka internasionál, membru governu, membru Parlamentu Nasionál no komunidade lubun.

Jornalista  : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here