Diretór Jerál Turizmu, José Filipe Dias Quintas. Imajen Egas Cristovão

DILI, 04 setembru 2019 (TATOLI) – Diretór Jerál Turizmu iha Ministériu Turizmu Komérsiu no Indústria (MTKI), José Filipe Dias Quintas, salienta imigrasaun presiza hadi’a formatu formuláriu ba rejistu turista ne’ebé tama Timor-Leste.

“Ita presiza hadi’a formatu formuláriu xegada atu kategoriza katak ema mai ne’e ho turista, serbisu ka vizita família, atu hafásil ita hatene turista hira maka tama Timor-Leste kada tinan”, José Quintas ba Ajénsia Tatoli iha Otél Timor, Kolmera, ohin.

Nune’e maka MTKI planeia ona atu koopera ho Ministériu Interiór liuliu Polísia Imigrasaun atu uza sistema integradu rejistu turista sira iha Aeroportu Internasionál Nicolau Lobato, Fronteira Terrestre Mota-Ain inklui Portu Dili, hodi hafásíl rejista turista hirak ne’ebé tama-sai iha Timor-Leste.

“Atu fásil ba Ministériu Turizmu no Diresaun Nasionál Estatístika foti dadus turista sira tama Timor-Leste, ita presiza hadi’a formuláriu xegada atubele sai formatu ne’ebé kategorizadu hodi fásíl hatene ema ne’ebé tama ho visa turista, serbisu no vizita família”, akresenta.

José Quintas friza formuláriu ne’ebé imigrasaun prepara ne’e la kategoriza sidadaun estranjeiru ne’ebé tama Timor-Leste, nune’e difisil atu hatete dadus turista hira maka tama no sai husi país.

“Ita planu hela atu oinsá fásil rejistu turista sira hanesan nasaun sira Austrália no Indonézia nian”, katak.

Iha 2019, turista sira tama Timor-Leste kompara ho 2018 kuaze sa’e ba porsentu tolu, tanba sira balun hakarak mai partisipa no haree komemorasaun Loron Konsulta Populár ba dala-20 (30 agostu 1999-30 agostu 2019) no Misaun INTERFET (Forsa Internasionál ba Timor-Leste).

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here