Sesaun plenária Parlamentu Nasionál. Imajen dok. Tatoli

DILI, 4 setembru 2019 (TATOLI)—Komisaun Permanente iha Parlamentu Nasionál (PN), ohin, laiha diskusaun tanba deputadu sira la priénxe korum.

“Ohin, deputadu sira la priénxe korum. Deputadu na’in-ualu de’it, entaun ha’u enserra tiha. Adia fali ba semana oin”, Segundu Vise Prezidente Parlamentu Nasionál, Luís Roberto, ba jornalista sira, iha Parlamentu Nasionál.

Maski nune’e, Xefe Bankada Partidu Demokrátiku (PD), António da Conceição ‘Kalohan’ dehan, loloos atividade Parlamentu liuhosi membru Komisaun Permanente hala’o serbisu hanesan normál, tanba laiha pontu toleránsia hosi Governu.

“Deputadu balun ohin komparese nafatin iha Parlamentu Nasionál kumpri ami-nia responsabilidade hanesan membru Komisaun Permanente ninian hodi bele hala’o atividade iha kuarta hodi halo plenária. Númeru deputadu loloos ne’e tenke marka prezensa. Nune’e mós mai hosi deputadu bankada Governu nian, maibé deputadu bankada Governu nian kala sei okupadu hela ho kontinuasaun Selebrasaun 30 Agostu ninian”, nia informa.

“Ami lamenta tanba ami lakon ami-nia tempu mai tuur hein hela maioria kaer ukun. Divia hahú ukun di’ak iha Parlamentu para depois lori to’o ba Governu, maibé bankada Governu nian mak ba toba dukur hotu. Depois haruka Vise Prezidente ida halo de’it anúnsiu dehan tanba la priénxe korum. Ne’e aktu ne’ebé lamentável”, Kalohan kestiona.

Nia haktuir, Komisaun Permanente foin mak halo reuniaun dala-tolu, maibé laiha ajénda prinsipál.

Kalohan esplika, reuniaun membru Komisaun Permanente sei halo atividade sira mak hanesan halo intervensaun, intervensaun kada bankada no informasaun hosi Ministru Reforma Lejizlativa. Ida ne’e mak nafatin ba nafatin sai ajénda ba reuniaun.

Tuir ajénda, ohin, Ministru Reforma Lejizlativa no Asuntu Parlamentár, Fidelis Manuel Leite Magalhães sei fahe informasaun balun ba Parlamentu Nasionál.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here