Estudante no komunidades sira partisipa iha Marsa ba pás ne'ebé hahú husi Otél Timor nia oin to'o CCD hodi komemora tinan 20, rezultadu Referendu (4 setembru 1999-4 setembru 2019). Imajen/Antonio Goncalves

DILI, 04 setembru 2019 (TATOLI)-  Estadu no Povu Timor-Leste, ohin, selebra hikas loron istóriku 4 setembru 1999, nu’udar loron importante hodi hanoin hikas tinan 20 ba kotuk rona rezultadu referendu ne’ebé fó sai husi Organizasaun Nasoins Unidas (ONU) katak, Timoroan hamutuk 344.50 maka rejeita autonomia hodi hili dalan Independénsia.

Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

Loron istóriku ne’e mós nu’udar loron importante hodi fó hanoin hikas ba povu katak, depois hili ukun rasik aan husi loron 4 Setembru 1999, Rai Timor ho nia povu sofre iha terus nia laran tenke hahú luta vida moris husi rai rahun.

Relasiona ho loron istóriku ne’e, Ministru Defeza no Ministru Interior Interinu, Filomeno da Paixão de Jesus, husu atu Timoroan hotu hamutuk luta dala ida  tan atu hetan moris di’ak liu iha era independénsia ne’e.

“Ba oin ita tenke muda ita nia hahalok di’ak liután, primeiru luta kontra korrupsaun, segundu ita hotu servisu ho sentidu estadu halo buat di’ak ba ita nia rain para bele hetan moris di’ak,”  hateten  Ministru Defeza Filomeno da Paixão de Jesus, ba jornalista sira, ohin, bainhira partisipa marsa ba pás husi Otél Timor ba Sentru Konvensaun Dili (CCD-sigla portugés).

Ministru mós apela ba povu liu-liu juventude sira agora tenke hanoin katak, joven sira uluk luta ho unidade atu lori Timor ba independénsia, no ba joven sira agora tenke unidade kontribui fali ba pás hodi luta estuda makas hadi’a vida moris.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here