Eis Prezidente Repúblika, José Manuel Ramos Horta. Imajen Tatoli/António Gonçalves

DILI, 4 setembru 2019 (TATOLI)—Eis Prezidente Repúblika ne’ebé hanesan mós Laureadu Nobel ba Pás, José Manuel Ramos Horta, afirma di’ak liu ema hotu buka de’it perdaun ba malu no haluha kanek sira liu ona hodi haburas dezenvolvimentu iha nasaun ne’e.

“Ita di’ak liu buka perdaun ba malu, hakuak malu maski injustisa ne’ebé boot liu mak okupasaun Indonézia halo mai ita. Maibé, to’o ikus, Indonézia nia ekonomia monu, mundu loke matan mai ita hodi apoiu ita,” dehan Horta ba jornalista iha Hotel Timor, ohin, relasiona ho entidade barak husu atu prosesa autór sira ne’ebé komete violasaun direitu umanu iha Timor-Leste durante okupasaun Indonézia.

Nia haktuir, uluk Amérika mak apoiu Indonézia tama Timor-Leste liliu apoiu kilat maibé to’o ikus hanoin hotu muda hodi apoiu fali Timor-Leste sai ukun rasik-aan.

“Ita haree, hosi aspeitu ba aspeitu, se nune’e ita mós tenke julga mós Amérika, Austrália no Indonézia. Maibé lae. Ida ne’e mak polítika Estadu timor nian. Polítika ita nian mak tau-matan ba vítima nia oan sira, ita nia eroi sira, faluk no oan ki’ak sira. Ida ne’e de’it mak ita tenke halo,” Horta esplika.

Nia hatutan, bainhira haree didi’ak, laiha nasaun ida iha mundu ezije Tribunál Espesiál, tan ne’e, líder Timor-Leste nian hahú kedas hosi Kay Rala Xanana Gusmão no líder hotu konkorda ho desizaun hirak ne’ebé fó sai ona katak ba oin ema hotu buka taka kanek isin no klamar nian tanba timoroan barak mós oho malu iha 1975 to’o 1999.

“Timoroan barak oho malu. La’ós tinan 1999 de’it. Hahú kedas tinan 1975. Iha 1999, milísia timoroan sira oho ita-nia maluk sira, maibé la’ós ne’e de’it. Milísia hirak ne’e sira-nia maluk balun mós ema oho iha tempu funu, hanesan Eurico Guterres nia aman mós uluk ema FRETILIN maibé militár Indonézia mak oho. Ita-nia luta ne’e iha buat barak ne’ebé komplikadu,” eis líder rezisténsia ne’e haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here