Grupu Independente Rekolla Dadus Veteranu Falsifikadu, hasai foto hamutuk ho Prezidente Repúblika, Francisco Guterres Lú Olo, ohin, hafoin ramata enkontru. Imajen Mídia PR

DILI, 4 setembru 2019 (TATOLI)—Grupu Independente Rekolla Dadus Veteranu Falsifikadu, aprezenta rezultadu verifikasaun ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Grupu ne’e iha ninia estrutura rasik kompostu hosi membru hamutuk na’in 19, ne’ebé durante ne’e hala’o serbisu hodi deteta no halo verifikasaun ba dadus falsifikadu sira iha munisípiu hotu inklui Rejiaun Administrativa Espesiál Oé-Cusse Ambeno (RAEOA).

Hafoin enkontru ho Xefe Estadu, Prezidente Grupu Independente, José Dias Guterres “Loimali”  hateten grupu independente ne’e instala ona iha munisípiu hotu inklui RAEOA.

Nia esplika, inisiativa harii ekipa ne’e tanba durante ne’e públiku preokupa ho falsifikasaun dokumentu barak no iha realidade hafoin verifikasaun iha duni falsifikasaun.

Tanba ne’e, ekipa deteta ona ema na’in 131 mak falsifika dokumentu no ekipa lori ona balun ba Tribunál Distritál Suai, balun iha Baucau no balun iha Tribunál Distritál Dili. Buat ne’ebé ekipa deteta mak viza ne’ebé falsifika barak liu, iha ema balun ne’ebé asina viza ne’e hodi falsifika ema ninia durasaun tempu luta.

Dadus hirak ne’e ekipa aprezenta ona ba Prezidente Repúblika no Prezidente Repúblika rasik fó apoiu ba inisiativa grupu refere no fó mós korajen hodi kontinua halo serbisu to’o hetan susesu.

Difikukdade ne’ebé durante ne’e ekipa hasoru mak Komisaun Omenájen seidauk entrega viza sira ne’ebé asinadu, nunee bele hala’o verifikasaun di’ak liután.

Maski nune’e, ekipa iha ona konfiansa katak Komisaun Omenájen tenke oferese viza ba sira, tanba ekipa ne’e rasik hetan ona apoiu hosi Prezidente Repúblika rasik.

“Komisaun Omenájen tenke rekoñese hodi fó viza ba ekipa independente ne’e, tanba Xefe Estadu autoriza ona atu halo verifikasaun no investigasaun ba falsifikasaun dokumentu sira”, José hateten.

Verifikasaun ne’e ekipa halo ba Frente Armada no Klandestina tuir ida-idak ninia grau, no ekipa ne’e rasik sei ba rejistu iha notariadu nu’udar ekipa legál iha tempu badak.

José Dias Guterres deklara katak ekipa refere kompostu hosi membru mai hosi partidu oioin, maibé hanesan veteranu tenke buka lia loos, no entrega ba Tribunál atu desidi.

Nia hatutan, Prezidente Repúblika apresia serbisu Grupu Independente ne’ebé fó ninian kontribuisaun atu hadi’a dadus veteranu sira-nian, tanba ne’e  preokupasaun Estadu nian.

Aleinde ne’e, José haktuir, Prezidente Repúblika hateten problema barak iha veteranu, tan ne’e timoroan hotu presiza kontribui atu hadi’a nune’e ema hotu bele tau konsiderasaun no respeitu Kombatente Libertasaun Nasionál.

José sita mós  Xefe Estadu nia lia menon katak  asaun sira labele halo atu hafahe veteranu sira, maibé presiza haree ho didi’ak atu dignifika veteranu tuir sira-nia dedikasaun.

Nia haklaken, Prezidente Repúblika kompriende preokupasaun Grupu Independente no sei ko’alia ho Primeiru-Ministru atu tau-matan.

Entretantu, Prezidente Repúblika  promulga ona Dekretu Lei Númeru 7/2018 kona-ba Estatutu Orgániku Konsellu Kombatente Libertasaun Nasionál  ne’ebe sei fó dalan atu harii organizasaun mahon ida ba veteranu hotu-hotu hodi promove direitu kombatente, dezenvolvimentu sustentável, memória no valór rezisténsia no ezersísiu podér.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here