Semaforu. Foto/Google.

DILI, 04 setembru 2019 (TATOLI)-Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun (MTK), João Eugénio da Silva, informa DNTT planeia hodi tau tan semáforu iha fatin tolu iha Dili maka hanesan iha loja Foho Osan Mean-Audian, rotunda Elemloi-Delta no Kulu-hun.

“Orsamentu ba tinan oin nian husi ami-nia departamentu sinál no tráfiku bele karik tau osan uitoan tanba ami planeia atu harii tan sinál tráfiku ka semáforu (lampu merah) iha fatin tolu”, Eugénio dehan ba Tatoli iha Balidi, ohin.

Nia hatutan aléinde planeia harii tan semáforu, departamentu ne’e mós husu atu iha tinan oin MTK bele fortifika DNTT hodi tau iha planu orsamentál nian atu halo alojamentu ka sosa ekipamentu sinál nian atubele aselera servisu di’ak liután.

“Ekipamentu hanesan sinál sira maka ami presiza tanba ida ne’e maka durante ne’e menus”, João afirma.

Nune’e nia espera iha tinan oin, ministériu tau importánsia ba ida ne’e no departamentu mós sei oposta iha planu nune’e bele tau konsiderasaun, maibé buat hotu sei halo diskusaun no tetu iha ministériu.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here